'ബാഡ് അങ്കിള്' 3വയസുകാരിയോട് ചെയ്തത്?
ബാംഗ്ലൂര്: ചൊവ്വാഴ്ച സ്കൂളിലെ ദീപാവലി ആഘോഷങ്ങള് കഴിഞ്ഞ് വീട്ടിലെത്തിയതായിരുന്നു മൂന്നുവയസ്സുകാരിയായ എല് കെ ജി വിദ്യാര്ഥിനി. എത്തിനിക് വസ്ത്രങ്ങളുമിട്ട് സന്തോഷത്തോടെ സ്കൂളിലേക്ക് പോയ കുട്ടി വീട്ടിലേക്ക് തിരിച്ചെത്തിയത് പക്ഷേ കരഞ്ഞുകൊണ്ടാണ്. ചെറുതായി പനിക്കുന്നുമുണ്ടായിരുന്നു. ഉച്ചയ്ക്ക് ഊണ് കഴിച്ച് ഒരു ഉറക്കവും കഴിഞ്ഞ ശേഷമാണ് കുട്ടി അമ്മയോട് കാര്യങ്ങള് പറഞ്ഞത്.
മകളുടെ അടുത്തിരുന്ന് വളരെ ശാന്തമായി അമ്മ ചോദിച്ചു. എന്താണ് പറ്റിയത്. സ്കൂളില് എന്തു സംഭവിച്ചു. സ്കൂളിലെ ഒരു ബാഡ് അങ്കിള് തന്നെ അടിച്ചു എന്നാണ് കുട്ടി അമ്മയോട് പറഞ്ഞത്. കൈയിലും കാലിലും മറ്റും അടിയേറ്റതിന്റെ പാടുകളും കുട്ടി അമ്മയെ കാണിച്ചു. എന്നാല് സ്വകാര്യ ഭാഗങ്ങളിലെ മുറിവുകളും പാടുകളും കണ്ടപ്പോഴാണ് സംഭവത്തിന്റെ ഗൗരവം കുട്ടിയുടെ അച്ഛനും അമ്മയ്ക്കും ശരിക്കും മനസിലായത്.
വ്യാഴാഴ്ച കുട്ടിയുടെ ക്ലാസ് ടീച്ചറുമായി അച്ഛനും അമ്മയും വിശദമായി സംസാരിച്ചു. എന്നാല് കുട്ടി ചൊവ്വാഴ്ച മുഴുവന് തന്റെ കൂടെ തന്നെ ഉണ്ടായിരുന്നു എന്ന് ക്ലാസ് ടീച്ചര് തറപ്പിച്ചു പറഞ്ഞു. കുട്ടിക്ക് എന്തെങ്കിലും മോശമായ അനുഭവം ഉണ്ടായി എന്ന് വിശ്വസിക്കാന് പോലും അവര് കൂട്ടാക്കിയില്ലത്രെ. രണ്ട് തവണ കുട്ടി ക്ലാസിന് പുറത്തുപോയപ്പോഴും ആയ കൂടെയുണ്ടായിരുന്നു - സി സി ടി വി ദൃശ്യങ്ങള് ചൂണ്ടിക്കാട്ടി അവര് വാദിച്ചു.
സ്കൂള് അധികൃതരുമായി തുടര്ന്ന് നടന്ന കൂടിക്കാഴ്ചകളിലൊന്നും തൃപ്തികരമായ മറുപടികള് ലഭിക്കാതെ വന്നതോടെയാണ് കാര്യങ്ങള് പോലീസില് എത്തിയത്. കുട്ടിയെ ആശുപത്രിയില് കൊണ്ടുപോയി വൈദ്യപരിശോധന നടത്തി. പരിശോധനയില് കുട്ടി ലൈംഗികമായി പീഡിപ്പിക്കപ്പെട്ടതായി തെളിഞ്ഞു. കുട്ടിയെ പീഡിപ്പിച്ച അറ്റന്ഡറെ പോലീസ് ചോദ്യം ചെയ്യുകയും സ്കൂളിനെതിരെ ക്രിമിനല് കേസ് എടുക്കുകയും ചെയ്തു.
ചോദ്യം അതല്ല, എന്ത് വിശ്വാസത്തിലാണ് കുട്ടികളെ നമ്മള് വിശ്വസിച്ച് സ്കൂളുകളില് അയക്കുക. ലക്ഷങ്ങള് ഫീസ് കൊടുത്ത് അയക്കുന്ന സ്കൂളുകളില് പോലും കുട്ടികള്ക്ക് രക്ഷയില്ല. എത്ര കുട്ടികളോട് അച്ഛനമ്മമാര് ശാന്തമായിരുന്ന് കാര്യങ്ങള് ചോദിച്ച് മനസിലാക്കുന്നുണ്ട്. എത്ര കുട്ടികള് നടന്ന കാര്യങ്ങള് അച്ഛനോടും അമ്മയോടും പറയും. നമ്മളുടെ കുട്ടികളെ ബാഡ് അങ്കിള്മാര് തൊടാതെ നോക്കേണ്ടതുണ്ട്. സ്കൂളിലെ സന്തോഷങ്ങള് മാത്രമല്ല, അനാവശ്യ സ്പര്ശനങ്ങളും അനിഷ്ട സംഭവങ്ങളും കൂടി തങ്ങളോട് പറയാന് കുട്ടികള്ക്ക് ധൈര്യം നല്കുക.