മൊബൈല്‍ ഫോണ്‍ ഉപയോഗിച്ചാല്‍ ഫത്‌വ

കാണ്‍പൂര്‍: ഇസ്ലാം മതനിയമങ്ങള്‍ക്ക്‌ വിരുദ്ധമായി പ്രവര്‍ത്തിക്കുന്നവര്‍ക്ക്‌ ഫത്‌വ ഏര്‍പ്പെടുത്തുന്ന രീതി മുസ്ലീങ്ങള്‍ക്കിടിയില്‍ നിലവിലുണ്ട്‌. ഇപ്പോഴിതാ കാണ്‍പൂരിലെ ഒരു വിദ്യാലയം മൊബൈലുകള്‍ക്ക്‌ ഫത്‌വ ഏര്‍പ്പെടത്തി വാര്‍ത്താപ്രാധാന്യം നേടിയിരിക്കുന്നു.

നാല്‍പത്‌ വര്‍ഷം പഴക്കമുള്ള ജാമിയ അഷ്‌റഫ്‌ ഉല്‍ മദാരിസ്‌ എന്ന വിദ്യാഭ്യാസ സ്ഥാപനത്തിലാണ്‌ മൊബൈല്‍ ഫോണ്‍ ഉപയോഗിക്കുന്ന വിദ്യാര്‍ത്ഥികള്‍ക്ക്‌ ഫത്‌വ ഏര്‍പ്പെടുത്തിയിരിക്കുന്നത്‌. കോളെജില്‍ ചെയ്യാവുന്നതും ചെയ്യരുതാത്തതുമായ കാര്യങ്ങളുടെയും പട്ടകി അധികൃതര്‍ തയ്യാറാക്കി നല്‍കിയിട്ടുണ്ട്‌.

ഇതില്‍ ചെയ്‌തുകൂടാത്ത കാര്യങ്ങളുടെ പട്ടികയിലാണ്‌ മൊബൈല്‍ ഫോണ്‍ ഉപോയഗത്തെ ഉള്‍പ്പെടുത്തിയിരിക്കുന്നത്‌. മൊബൈലില്‍ ഖുറാനിലെ വിശുദ്ധ വരുകള്‍ റിങ്‌ ടോണായി ഉപയോഗിക്കുന്നതിനും വിലക്കുണ്ട്‌. ചെയ്‌തുകൂടാത്ത കാര്യങ്ങള്‍ ചെയ്‌താല്‍ ഫത്‌വ നേരിടേണ്ടിവരും.

ഖുറാന്‍ വചനങ്ങള്‍ റിങ്‌ ടോണും കോളര്‍ ടോണുമായി ഉപോയഗിക്കുമ്പോള്‍ പലപ്പോഴും അവ പൂര്‍ത്തിയാകുന്നതിന്‌ മുമ്പ്‌ മൊബൈല്‍ ഉപയോഗിക്കുന്നയാള്‍ കോള്‍ അറ്റന്റ്‌ ചെയ്യും. ഇതുമൂലം വിശുദ്ധ വരികള്‍ അപൂര്‍ണമാകും.

ഇങ്ങനെ ആയത്‌ അപൂര്‍ണമായി ചൊല്ലുന്നത്‌ ഇസ്ലാം ആചാരപ്രകാരം പാപമാണ്‌. അതുകൊണ്ടാണത്രേ ഖുറാന്‍ വനചനങ്ങള്‍ മൊബൈലില്‍ ഉപയോഗിക്കുന്നതിനെ വിലക്കിയിരിക്കുന്നത്‌.

നമസ്‌കാര സമയത്ത്‌ മൊബൈല്‍ ഫോണ്‍ വൈബ്രേഷന്‍ മോഡില്‍ ഇടാനോ ടോയ്‌ലറ്റില്‍ മൊബൈല്‍ ഉപയോഗിക്കാനോ പാടില്ലെന്നും നിര്‍ദ്ദേശമുണ്ട്‌.