സ്വവര്ഗരതി: വിധിക്ക് സ്റ്റേയില്ല
ദില്ലി: സ്വവര്ഗരതി നിയമവിധേയമാക്കണമെന്ന ദില്ലി ഹൈക്കോടതി വിധി സ്റ്റേ ചെയ്യാന് സുപ്രീം കോടതി വിസമ്മതിച്ചു. 377ാം വകുപ്പ് ഭേദഗതി ചെയ്യുന്നത് സംബന്ധിച്ച് നിലപാട് വ്യക്തമാക്കാന് സര്ക്കാരിന് എട്ടാഴ്ചയുടെ സമയം കൂടി കോടതി അനുവദിച്ചു.
പ്രായപൂര്ത്തിയായവര് പരസ്പരസമ്മതത്തോടെ സ്വവര്ഗരതിയില് ഏര്പ്പെടുന്നത് കുറ്റകരമല്ലെന്ന് ജൂലായ് രണ്ടിനാണ് ദില്ലി ഹൈക്കോടതി വിധിച്ചത്. ഈ വിധിക്കെതിരെ സുരേഷ്കുമാര് കൗശല് എന്ന ജ്യോത്സ്യനാണ് സുപ്രീംകോടതിയില് ഹര്ജി നല്കിയത്. വിധി വന്നശേഷം ഏഴ് സ്വവര്ഗവിവാഹങ്ങള് നടന്നതായും ഇത് വിവാഹമെന്ന സങ്കല്പത്തെത്തന്നെ തകര്ക്കുന്നതാണെന്നും ഹര്ജിക്കാരന് വാദിച്ചു.
സ്വവര്ഗരതി ക്രിമിനല് കുറ്റമായി കാണുന്ന ഇന്ത്യന് ശിക്ഷാനിയമത്തിലെ 377ാം വകുപ്പ് ഭേദഗതി ചെയ്യണമെന്ന ഹൈക്കോടതി നിര്ദേശം കേന്ദ്രസര്ക്കാര് ഗൗരവമായി പരിഗണിക്കുമ്പോഴാണ് സുപ്രീംകോടതി തന്നെ കേന്ദ്രത്തെ കക്ഷിയാക്കിയത്.
ഹൈക്കോടതി വിധിയെ ഒരു വിഭാഗം സ്വാഗതം ചെയ്തപ്പോള് മതസംഘടനകളും ചില പ്രതിപക്ഷ പാര്ട്ടികളും വിധിക്കെതിരെ രംഗത്തെത്തിയിരുന്നു.