എവറസ്റ്റിന് മുകളിലും ഇന്റര്‍നെറ്റ്

കാഠ്മണ്ഡു: ലോകത്തേറ്റവും ഉയരം കൂടിയ കൊടുമുടിയായ എവറസ്റ്റിന് മുകളിലും ഇനി 3ജിയും ഇന്റര്‍നെറ്റും.

സ്വീഡിഷ് മൊബൈല്‍ ഫോണ്‍ സേവനദാതാക്കളായ ടെലിയ സോനേറയയുടെ നേപ്പാളിലെ അനുബന്ധ സ്ഥാപനമായ എന്‍സെല്‍' എവറസ്റ്റ് മേഖലയില്‍ 5200 മീറ്റര്‍ ഉയരത്തില്‍ 3ജി ഫോണ്‍ സ്റ്റേഷന്‍ സ്ഥാപിച്ചതോടെയാണ് ഇത് സാധ്യമായത്.
വെള്ളിയാഴ്ച എവറസ്റ്റ് കൊടിമുടിയില്‍ നിന്ന് ആദ്യമായി വീഡിയോ കോള്‍ സംവിധാനത്തില്‍ സംസാരിച്ചതായി എന്‍സെല്‍ നേപ്പാള്‍ തലവന്‍ പാസി കോയിസ്റ്റിനന്‍ പറഞ്ഞു.

8848 മീറ്റര്‍ ഉയരമുള്ള എവറസ്റ്റ് കയറുന്ന പര്‍വതാരോഹകര്‍ക്ക് ഇതുവരെ ഉപഗ്രഹഫോണുകള്‍ മാത്രമാണ് ഉപയോഗിക്കാന്‍ കഴിഞ്ഞിരുന്നത്. പര്‍വതാരോഹകര്‍ക്ക് പുറമെ മേഖലയിലെത്തുന്ന ആയിരക്കണക്കിന് ടൂറിസ്റ്റുകള്‍ക്കും പുതിയ ഫോണ്‍ സംവിധാനം സഹായകരമാവും.

ലോകത്തേറ്റവും താഴ്ചയിലെ 3ജി ഫോണ്‍ സംവിധാനവും ടെലിയസോനേറ തന്നെയാണ് ഒരുക്കിയിരിക്കുന്നത്. യൂറോപ്പിലെ ഒരു ഖനിയില്‍ ഇവര്‍ സ്ഥാപിച്ചിരിയ്ക്കുന്ന 3ജി ബേസ് കടല്‍നിരപ്പിനും 1400 മീറ്റര്‍ താഴെയാണ് സ്ഥിതി ചെയ്യുന്നത്.