ബെംഗളൂരു: പാസിന്റെ പേരില് വാഗ്വാദം, വനിതാ ബിഎംടിസി കണ്ടക്ടര് വിദ്യാര്ത്ഥിയെ കടിച്ചു!!
ബെംഗളൂരു: ബസ് പാസിന്റെ പേരിലുണ്ടായ വാഗ്വാദത്തെ തുടര്ന്ന് വനിതാ കണ്ടക്ടര് വിദ്യാര്ത്ഥിയുടെ കയ്യില് കടിച്ചു. ചൂടേറിയ തര്ക്കങ്ങള്ക്കൊടുവില് ബെംഗളൂരുവിലെ കെജി ഹള്ളി ബസ് സ്റ്റാന്ഡില് വ്യാഴാഴ്ചയായിരുന്നു സംഭവം.
ബിഎംടിസി ബസിന്റെ ഫൂട്ട് ബോര്ഡില് സഞ്ചരിക്കുകയായിരുന്ന വിദ്യാര്ത്ഥികളോട് ബസിനുള്ളിലേയ്ക്ക് കടന്നു നില്ക്കാന് ആവശ്യപ്പെട്ടുവെന്നും എന്നാല് തങ്ങളെ അടുത്ത ബസ് സ്റ്റോപ്പില് ഇറക്കിവിടുകയായിരുന്നു എന്നാണ് ഇതില് ഒരു വിദ്യാര്ത്ഥിയുടെ ആരോപണം. 26കാരിയായ ബിഎംടിസി കണ്ടക്ടര് അരുണിമയ്ക്കെതിരെയാണ് ആരോപണം ഉയര്ന്നിട്ടുള്ളത്.
വിദ്യാര്ത്ഥികളില് നിന്ന് ബസ് പാസ് ആവശ്യപ്പെട്ട കണ്ടക്ടര് ബസ് ഡിപ്പോയില് വന്ന് തിരികെ വാങ്ങാന് ആവശ്യപ്പെട്ടു. എന്നാല് പാസ് കൈവശപ്പെടുത്താന് ശ്രമിക്കുന്നതിനിടെ കണ്ടക്ടര് വിദ്യാര്ത്ഥികളില് ഒരാളുടെ കയ്യില് കടിച്ചെന്നുമാണ് ആരോപണം. വിദ്യാര്ത്ഥിയെ കടിച്ച കണ്ടക്ടറെ തട്ടിയിട്ട് വിദ്യാര്ത്ഥികള് രക്ഷപ്പെട്ടുവെന്നാണ് പൊലീസ് നല്കുന്ന വിവരം. സംഭവത്തില് ഗംഗമ്മനഗുഡി പൊലീസ് കേസ് രജിസ്റ്റര് ചെയ്തിട്ടുണ്ട്.