യാത്രക്കാരിക്ക് അശ്ലീല എസ്എംഎസ്; ഒല ഡ്രൈവര്ക്ക് പണികിട്ടി!
ബെംഗളൂരു: ടാക്സി ബുക്ക് ചെയ്ത ശേഷം കാന്സല് ചെയ്ത യാത്രക്കാരിയുടെ ഫോണിലേക്ക് ഒല ഡ്രൈവറുടെ വക അശ്ലീല എസ് എം എസ്. ഐ ടി നഗരമായ ബെംഗളൂരുവിലാണ് ഞെട്ടിപ്പിക്കുന്ന സംഭവം ഉണ്ടായത്. സംഭവം വിവാദമായതോടെ ഡ്രൈവറെ സസ്പെന്ഡ് ചെയ്ത് മുഖം രക്ഷിക്കാനുള്ള ശ്രമത്തിലാണ് ഒല.
ഫെബ്രുവരി ആറാം തീയതിയാണ് യുവതി ഒല കാബ് ബുക്ക് ചെയ്തത്. എന്നാല് അടിയന്തിരമായി മറ്റൊരു കാര്യം ചെയ്യേണ്ടി വന്നതുകൊണ്ട് ഇവര് ഈ ട്രിപ്പ് കാന്സല് ചെയ്തു. ഇക്കാര്യം സ്ഥിരീകരിച്ച് ഒലയില് നിന്നും ഇവര്ക്ക് സന്ദേശവും ലഭിച്ചു. എന്നാല് കുറച്ചുകഴിഞ്ഞ ശേഷം ഡ്രൈവര് ഇവരെ ഫോണില് വിളിച്ചു. ഇതിന് ശേഷമാണ് യാത്രക്കാരിയുടെ ഫോണിലേക്ക് ഡ്രൈവര് അശ്ലീല സന്ദേശം അയച്ചത്.
ഡ്രൈവര് അയച്ച സന്ദേശം സ്ക്രീന് ഷോട്ടെടുത്ത് മൈക്രോ ബ്ലോഗിങ് സൈറ്റായ ട്വിറ്ററിലും ഇട്ടു. തിരിച്ച് നല്ലത് പറഞ്ഞുകൂടായിരുന്നോ എന്ന് ചോദിച്ചുകൊണ്ടാണ് ആളുകള് ഈ സന്ദേശത്തോട് പ്രതികരിച്ചത്. ഒലയുടെ സര്വ്വീസ് വളരെ മോശമാണ് എന്നും ഇവരുടെ ഡ്രൈവര്മാര്ക്ക് പെരുമാറാന് അറിയില്ല എന്നും അഭിപ്രായങ്ങള് ഉയര്ന്നു.
ആളുകള് കൂട്ടത്തോടെ പ്രതികരിക്കാന് തുടങ്ങിയതോടെ ഒല രംഗത്തെത്തി. യാത്രക്കാരിയെ അപമാനിച്ച ഡ്രൈവറെ സസ്പെന്ഡ് ചെയ്തു എന്നറിയിച്ചായിരുന്നു ഒലയുടെ പോസ്റ്റ്. അശ്ലീല സന്ദേശം അയച്ച ഡ്രൈവറുടെ ഫോണ് നമ്പര് ബ്ലോക്ക് ചെയ്യാനും ഒല യാത്രക്കാരിയോട് പറഞ്ഞു. ഇതിന് മുമ്പും ഒല, യുബര് തുടങ്ങിയ ടാക്സികളുടെ ഡ്രൈവര്മാര് യാത്രക്കാരെ അപമാനിച്ച സംഭവം ഉണ്ടായിട്ടുണ്ട്.