മാഗി നൂഡില്‍സ് വീണ്ടും പരിശോധനയ്ക്ക് നിര്‍ദ്ദേശം

മുംബൈ: ജൂണ്‍ ആദ്യവാരം ഇന്ത്യയിലെമ്പാടും നിരോധിച്ച മാഗി നൂഡില്‍സ് വീണ്ടും പരിശോധിക്കാന്‍ മുംബൈ ഹൈക്കോടതി നിര്‍ദ്ദേശം. മാഗി കമ്പനിയായ നെസ്ലെയുടെ അപേക്ഷ പ്രകാരമാണ് കോടതി ഉത്തരവ്. അഞ്ചോളം ലാബുകളില്‍ നടത്തുന്ന ടെസ്റ്റ് നെസ്ലെയും ഫുഡ് സേഫ്റ്റി അതോറിറ്റിയും അംഗീകരിക്കേണ്ടിവന്നേക്കുമെന്നാണ് റിപ്പോര്‍ട്ട്.

മാഗിയില്‍ അനുവദനീയമായതിലും അധികം ലെഡ് കണ്ടെത്തിയതിനാലാണ് അത് നിരോധിക്കാന്‍ ഫുഡ് സേഫ്റ്റി റെഗുലേറ്റര്‍ ഉത്തരവിട്ടത്. ഇതേ തുടര്‍ന്ന് കോടിക്കണക്കിന് രൂപയുടെ മാഗി ഉത്പന്നങ്ങള്‍ നെസ്ലെ കമ്പനി കടകളില്‍ നിന്നും പിന്‍വലിക്കുകയും നശിപ്പിച്ചു കളയുകയും ചെയ്തു. കോടതിയില്‍ നിന്നും അനുകൂല വിധി സമ്പാദിച്ചശേഷം മാഗി വീണ്ടും വിപണിയില്‍ ഇറക്കാനാണ് കമ്പനിയുടെ പരിപാടി.

ഇതിനായി, രാജ്യത്തെ വിവിധ ലാബുകളില്‍ നടത്തിയ ടെസ്റ്റ് ശരിയല്ലെന്നാണ് മാഗി കോടതിയില്‍ വാദിച്ചത്. ചില ലാബുകള്‍ക്ക് അംഗീകാരമില്ലെന്നും ചിലതിന് ശരിയായ പരിശോധനാ സംവിധാനം ഇല്ലെന്നുമായിരുന്നു നെസ്ലെയുടെ വാദം. ഇതേ തുര്‍ന്നാണ് മാഗി വീണ്ടും ടെസ്റ്റ് നടത്താന്‍ കോടതി നിര്‍ദ്ദേശിച്ചിരിക്കുന്നതെന്നാണ് വിവരം.

കോടതിയുടെ നിര്‍ദ്ദേശത്തെ സംബന്ധിച്ച് ഫുഡ് സേഫ്്റ്റി അതോറിറ്റി ശനിയാഴ്ച പ്രതികരിക്കും. ശരിയായ രീതിയില്‍ പരിശോധന നടത്തിയശേഷം മികച്ചതാണെന്ന് തെളിയിക്കപ്പെട്ടാല്‍ മാത്രമേ വിപണിയിലേക്ക് തിരിച്ചുവരികയുള്ളൂ എന്നാണ് മാഗി നേരത്തെ അറിയിച്ചിരിക്കുന്നത്. അതുകൊണ്ടുതന്നെ, മാഗിയുടെ പുതിയ പരിശോധന നെസ്ലെയ്ക്ക് നിര്‍ണായമായിരിക്കും.

English summary

Court Suggesting New Maggi Noodle Tests