മരണവും സംസ്ക്കാരവും കഴിഞ്ഞു ; വെണ്ണില തിരിച്ചെത്തി
പുതുക്കോട്ട : മരിച്ചെന്ന് കരുതി മാസങ്ങള്ക്ക് മുമ്പ് വീട്ടുകാര് ശവസംസ്കാരം നടത്തിയ യുവതി ജീവനോടെ മടങ്ങിയെത്തി. തമിഴ്നാട്ടിലെ പുതുക്കോട്ടയിലാണ് സംഭവം. വെണ്ണില എന്ന ഇരുപത്തിയൊന്നുകാരിയാണ് തിങ്കളാഴ്ച വീട്ടില് തിരിച്ചെത്തിയത്.
വീട്ടുകാര് തീരുമാനിച്ച വിവാഹത്തില് തനിക്ക് താല്പ്പര്യമില്ലാത്തതിനാല് ആരോടുംപറയാതെ വീടുവിട്ടിറങ്ങുകയായിരുന്നുവെന്ന് യുവതി പോലീസിനോട് പറഞ്ഞു. വെണ്ണിലയെ കാണാതായതിനെത്തുടര്ന്ന് മാസങ്ങള്ക്ക് മുമ്പ് പിതാവ് ചിന്നയ്യ പോലീസില് പരാതി നല്കിയിരുന്നു. തുടര്ന്ന് പോലീസ് കണ്ടെടുത്ത അജ്ഞാതമൃതദേഹം യുവതിയുടേതാണെന്ന വിശ്വാസത്തില് സംസ്ക്കരിക്കുകയും ചെയ്തു.
തിരിച്ചെത്തിയ യുവതിയെ കോടതിയില് ഹാജരാക്കിയശേഷം മാതാപിതാക്കള്ക്കൊപ്പം വിട്ടയച്ചു. യുവതിയുടേതെന്ന് കരുതി സംസ്ക്കരിച്ച മൃതദേഹം ആരുടേതാണെന്ന കാര്യം പോലീസ് അന്വേഷിച്ചുവരികയാണ്.