പെട്രോളിന്‍റേയും ഡീസലിന്‍റേയും എക്സൈസ് തീരുവ ഒന്നര രൂപ കൂട്ടി

ദില്ലി: കുറച്ചിടയായി ഇന്ധവില കുത്തനെ കുറയുന്ന വാര്‍ത്തകളായിരുന്നു കേട്ടിരുന്നത്. മോദി സര്‍ക്കാര്‍ അധികാരത്തിലെത്തിയതിന് ശേഷം പെട്രോളിനും ഡീസലിനും വില കുറയാന്‍ തുടങ്ങിയപ്പോള്‍ ജനങ്ങള്‍ ഇത്തിരിയധികം സന്തോഷിച്ചിരുന്നു.

എന്നാല്‍ ഇന്ധനവില കുറക്കാന്‍ മാത്രമല്ല, കൂട്ടാനും മോദിയുടെ സര്‍ക്കാരിന് അറിയാമെന്നാണ് ഇപ്പോഴത്തെ വാര്‍ത്ത നല്‍കുന്ന സൂചന. അന്താരാഷ്ട്ര വിപണിയില്‍ ഇന്ധനവില കുത്തനെ ഇടിഞ്ഞുകൊണ്ടിരിക്കുമ്പോള്‍ അതിനനുസരിച്ച് ഇന്ത്യയില്‍ വില കുറക്കേണ്ടതില്ലെന്നാണ് തീരുമാനം. വില പിടിച്ചു നിര്‍ത്താന്‍ പെട്രോളിന്റേയും ഡീസലിന്റേയും എക്‌സൈസ് തീരുവ ഒന്നര രൂപ കൂട്ടാനാണ് കേന്ദ്ര സര്‍ക്കാരിന്റെ തീരുമാനം.

വെറുത വില കൂട്ടുക എന്നതല്ല സര്‍ക്കാര്‍ ലക്ഷ്യമിടുന്നത്. രാജ്യത്തിന്റെ സമ്പദ്ഘടന ശക്തമാക്കാന്‍ ഈ നികുതിപ്പണം ഉപയോഗിക്കും.

ബ്രാന്‍ഡഡ് പെട്രോളിന് ലിറ്ററിന് 2.35 പൈസയായിരുന്നു എക്‌സൈസ് തീരുവ. ഇത് ഒറ്റയടിക്ക് 3.85 രൂപയാക്കി. ബ്രാന്‍ഡ് ചെയ്യാത്തതിന് ലിറ്ററിന് 1.20 രൂപയായിരുന്നത് ഒറ്റയടിക്ക് 2.70 രൂപയാക്കി. ബ്രാന്‍ഡഡ് ഡീസലിന്റെ എക്‌സൈസ് തീരുവ ലിറ്ററിന് 3.75 രൂപയായിരുന്നത് 5.25 രൂപയാക്കി. ബ്രാന്‍ഡ് ചെയ്യാത്തതിന് 1.46 രൂപയില്‍ നിന്ന് 2.96 രൂപയും ആക്കി.

ആഗോള വിപണിയില്‍ എണ്ണവില ഇടിഞ്ഞുകൊണ്ടിരിക്കുകയാണ്. കഴിഞ്ഞ അഞ്ച് മാസത്തിനിടെ വിലയില്‍ 25 ശതമാനമാണ് കുറവ് വന്നിരിക്കുന്നത്. എന്നാല്‍ ഈ പ്രതിഭാസം അധിക നാള്‍ നീണ്ടുനില്‍ക്കില്ലെന്നാണ് പ്രതീക്ഷിക്കുന്നത്.

English summary

Excise duty on petrol & diesel hiked by Rs 1.50/litre