ദീപാവലി കൊഴുപ്പിക്കാന് മോദിയും പ്രിയങ്കയും മേരി കോമും!
അലഹാബാദ്: പ്രധാനമന്ത്രി 'നരേന്ദ്ര മോദി'യും കോണ്ഗ്രസ് നേതാവ് 'പ്രിയങ്ക ഗാന്ധി'യും ഈ ദീപാവലിക്ക് പടേ പടേന്ന് പൊട്ടും. മോദിയും പ്രിയങ്കയും മാത്രമല്ല, ബോക്സിംഗ് ഇതിഹാസം 'മേരി കോമും' ചൊവ്വയിലേക്ക് പോയ 'മംഗള്യാനും' ദീപാവലി ആഘോഷങ്ങള്ക്ക് ഒച്ചയും നിറവുമേകും. നനഞ്ഞുപോയതെങ്കിലും രാഹുലിന്റെ പേരിലുമുണ്ട് ദീപാവലി പടക്കങ്ങള്.
കഴിഞ്ഞ ഏതാനും വര്ഷങ്ങളായുള്ള ട്രെന്ഡാണ് രാഷ്ട്രീയ നേതാക്കളുടെയും സ്പോര്ട്സ് താരങ്ങളുടെയും പേരില് ദീപാവലി പടക്കങ്ങള്ക്ക് പേരിടുക എന്നത്. കഴിഞ്ഞ വര്ഷം പൂക്കുറ്റിയുടെ രൂപത്തിലായിരുന്നു മോദി ബാംഗ്ലൂരില് അവതരിച്ചത്. വില കുത്തനെ കയറുന്തോറും മോദിത്തിരികള്ക്കുള്ള ഡിമാന്ഡും കൂടി. കളിക്കാരെയും സിനിമാക്കാരെയും കടത്തിവെട്ടിയാണ് ദീപാവലി മാര്ക്കറ്റില് മോദി ഹിറ്റായത്.
സൗഹൃദത്തിന്റെ പടക്കം എന്നാണ് ഇത്തവണ മോദി പടക്കങ്ങള്ക്ക് പേര്. കഴിഞ്ഞ വര്ഷം വന് ഡിമാന്ഡ് ഉണ്ടായിരുന്ന രാഹുല് പടക്കങ്ങളുടെ സ്ഥിതി എന്നാല് ഇത്തവണ അതല്ല. കോണ്ഗ്രസ് നേതൃത്വത്തിലെ എന്ന പോലെ രാഹുലിന് പകരം പ്രിയങ്ക എന്നാണ് പടക്കക്കച്ചവടക്കാരുടെയും താല്പര്യം. എന്തായാലും പ്രിയങ്കയുടെ പേരില് ബോംബ് അല്ല, പൂത്തിരിയാണ് ഇത്തവണ ഇറങ്ങിയിരിക്കുന്നത്.
ബീഹാര് മുഖ്യമന്ത്രിമാരായിരുന്ന ലാലു പ്രസാദ് യാദവ്, റാബ്രി ദേവി, മുന് ദില്ലി മുഖ്യമന്ത്രി അരവിന്ദ് കെജ്രിവാള്, അക്ഷയ് കുമാര്, കത്രീന കൈഫ്, വിരാട് കോലി, എം എസ് ധോണി തുടങ്ങിയ സെലിബ്രിറ്റികളായിരുന്നു സാധാരണ പടക്ക വിപണികളിലെ ഹോട്ട് പേരുകള്. എന്നാല് പ്രധാനമന്ത്രി നരേന്ദ്ര മോദിയാണ് ഇപ്പോള് ഇവിടെയും താരം.