മണിപ്പൂരില് പുതിയ പിസിസി അധ്യക്ഷനെ ഏഴ് ദിവസത്തിനകം നിയമിക്കും: കോണ്ഗ്രസ്
ഇംഫാല്: മണിപ്പൂർ പ്രദേശ് കോൺഗ്രസ് കമ്മിറ്റിയുടെ പുതിയ പ്രസിഡന്റിനെ ഏഴു ദിവസത്തിനകം തിരഞ്ഞെടുക്കുമെന്ന് സംസ്ഥാനത്തിന്റെ ചുമതലയുള്ള എഐസിസി ജനറല് സെക്രട്ടറി ഭക്ത ചരൺ ദാസ് വ്യക്തമാക്കി. പിസിസി അധ്യക്ഷനായിരുന്ന കോന്തൗജം ദാസ് പദവി രാജിവെച്ചതിന് പിന്നാലെയുണ്ടായ പ്രശ്നങ്ങള് പരിഹരിക്കുന്നതിന് വേണ്ടിയായിരുന്നു ഭക്ത ചരണ് ദാസ് സംസ്ഥാനത്ത് എത്തിയത്. രാജിവെച്ച് മുന് പിസിസി അധ്യക്ഷനും ഏതാനും കോണ്ഗ്രസ് എംഎല്എമാരും ഉടന് കോണ്ഗ്രസില് ചേര്ന്നേക്കുമെന്നും റിപ്പോര്ട്ടുണ്ടായിരുന്നു.
രണ്ട് ദിവസത്തെ സന്ദർശനത്തിനായി ബുധനാഴ്ച ഇംഫാലിലെത്തിയ ദാസ്, പ്രശ്നങ്ങൾ ഇതുവരെ പരിഹരിക്കപ്പെട്ടിട്ടില്ലാത്തതിനാൽ കുറച്ചുദിവസം കൂടി താമസിക്കാൻ സാധ്യതയുണ്ട്. മണിപ്പൂർ പിസിസിയിൽ നിരവധി ഗ്രൂപ്പുകളുമായി അദ്ദേഹം ഇതിനോടകം കൂടിക്കാഴ്ച നടത്തിയിട്ടുണ്ടെങ്കിലും പുതിയ പ്രസിഡന്റിനെ കാര്യത്തില് ഇതുവരെ ഒരു തീരുമാനം എടുക്കാന് സാധിച്ചിട്ടില്ല.
പ്രസിഡന്റായിരുന്ന ഗോവിന്ദാസ് കോന്തൗജം ജൂലൈ 16 നായിരുന്നു പാർട്ടിയുടെ ദേശീയ പ്രസിഡന്റ് സോണിയ ഗാന്ധിക്ക് രാജിക്കത്ത് സമർപ്പിച്ചത്. പുതിയ പ്രസിജന്റിനെ തിരഞ്ഞെടുക്കുമെന്ന് ഭക്ത ചരണ് ദാസ് വ്യക്തമാക്കിയതോടെ കോന്തൗജമിന്റെ രാജി നേതൃത്വം സ്വീകരിച്ചതായാണ് സൂചന.