രാജ്യത്ത് അമ്മിഞ്ഞപ്പാലും ഇനി ബാങ്കില് നിന്ന് വാങ്ങാം!
ജയ്പ്പൂര്: സംസ്ഥാന സര്ക്കാരിന്റെ ഉടമസ്ഥതയില് രാജസ്ഥാനില് ആദ്യമായി മുലപ്പാല് ബാങ്ക് തുറന്നു . രാജസ്ഥാനിലെ ഉദയ്പൂരിലെ സര്ക്കാര് ആശുപത്രിയിലാണ് മുലപ്പാല് ബാങ്ക് പ്രവര്ത്തനം തുടങ്ങിയത്. ജീവന് ധാര എന്നാണ് മുലപ്പാല് ബാങ്കിന്റെ പേര് . ബാങ്കിന്റെ ഉദ്ഘാടനം ആരോദ്യമന്ത്രി രാജേന്ദ്ര രാത്തോര് നിര്വഹിച്ചു .
നോര്വീജിയന് സര്ക്കാരുമായി സഹകരിച്ചാണ് മുലപ്പാല് ബാങ്ക് തുറന്നത് . നവജാത ശിശുക്കളുടെ അമ്മമാരില് നിന്നും പാല് ശേഖരിച്ച് ബാങ്കില് സൂക്ഷിയ്ക്കുകയും ആവശ്യമുള്ള കുഞ്ഞുങ്ങള്ക്ക് നല്കുകയും ചെയ്യും . അമ്മയ്ക്ക് മുലപ്പാല് ഇല്ലാതെ വരിക, അമ്മയെ നഷ്ടമാവുക , ഉപേക്ഷിയ്ക്കപ്പെട്ട കുഞ്ഞുങ്ങള് എന്നിവര്ക്കൊക്കെ ഇത്തരത്തില് ശേഖരിയ്ക്കുന്ന മുലപ്പാല് ഉപയോഗപ്പെടും .
ആയിരം കുട്ടികള് ജനിയ്ക്കുമ്പോള് അതില് 47 പേര് മരിയ്ക്കുന്നതാണ് രാജസ്ഥാനിലെ ശിശുമരണ നിരക്ക് . ജനിയ്ക്കുമ്പോള് മുലപ്പാല് കിട്ടാത്തതും കുഞ്ഞുങ്ങളുടെ ജീവഹാനിയ്ക്ക് കാരണമാകും . മുലപ്പാല് ബാങ്കിലൂടെ ശിശുമരണ നിരക്ക് കുറയ്ക്കാനാകുമെന്നും പ്രതീക്ഷിയ്ക്കുന്നു . മുലപ്പാല് ദാനത്തിന് പ്രാധാന്യം നല്കുന്ന പദ്ധതികള്ക്കും രാജസ്ഥാന് സര്ക്കാര് തുടക്കമിട്ടിട്ടുണ്ട് .