ബലാത്സംഗ കേസിലെ പ്രതിയെ ജയില്‍ ആക്രമിച്ച് നാട്ടുകാര്‍ നഗ്നനാക്കി തല്ലിക്കൊന്നു

ദിമാപുര്‍: ബലാത്സംഗം ചെയ്യുന്നവര്‍ക്ക് എന്ത് ശിക്ഷയാണ് നല്‍കേണ്ടതെന്നത് സംബന്ധിച്ച് പലര്‍ക്കും പല അഭിപ്രായങ്ങളുണ്ടാകും. എന്നാല്‍ നാഗാലാന്‍ഡിലെ നാട്ടുകാര്‍ പ്രതിയെ ക്രൂരമായി തല്ലിക്കൊല്ലുകയാണ് ചെയ്തത്. അതും ജയില്‍ ആക്രമിച്ച് ഇയാളെ പുറത്തിറക്കിയതിന് ശേഷം.

ബംഗ്ലാദേശില്‍ നിന്ന് കുടിയേറി പാര്‍ത്ത സയ്യിദ് ഫരീദ് ഖാന്‍ എന്നയാളെയാണ് നാട്ടുകാര്‍ ജയിലില്‍ നിന്ന് പിടിച്ചിറക്കി നഗ്നനാക്കി തല്ലിക്കൊന്നത്. 20 വയസ്സുള്ള നാഗ യുവതിയെ ആണ് ഇയാള്‍ ബലാത്സംഗം ചെയ്തത്.

നാലായിരത്തോളംവരുന്ന ജനക്കൂട്ടം ദിമാപുര്‍ജില്ലാ ജയില്‍ ആക്രമിക്കുയായിരുന്നു. തുടര്‍ന്ന് ഫരീദ് ഖാനെ പിടിച്ചിറക്കി. നഗ്നനാക്കി. ക്രൂരമായി തല്ലിക്കൊന്നു. നിരവധി വാഹനങ്ങളും പ്രതിഷേധക്കാര്‍ തീയിട്ടു. ജില്ലയില്‍ പോലീസ് കര്‍ഫ്യൂ പ്രഖ്യാപിച്ചു.

ഫെബ്രുവരി 23 നാണ് ഇയാള്‍ നാഗ യുവതിയെ ബലാത്സംഗം ചെയ്തത് . 24 സ്ഥലങ്ങളില്‍ കൊണ്ടുപോയാണ് യുവതിയെ ക്രൂരമായി പീഡിപ്പിച്ചത്. അടുത്ത ദിവസം തന്നെ ഇയാളെ അറസ്റ്റ് ചെയ്യുകയും ചെയ്തു.

പ്രതിഷേധക്കാരെ ഒഴിപ്പിക്കാന്‍ പോലീസ് ആകാശത്തേക്ക് വെടിവച്ചു . കണ്ണീര്‍ വാതകവും ഉപയോഗിച്ചു. അടിയന്തര മന്ത്രിസഭ യോഗം സംഭവത്തെ കുറിച്ച് അന്വേഷിക്കാന്‍ ഉത്തരവിട്ടിട്ടുണ്ട് .

English summary

Rape accused dragged out of jail, lynched in Nagaland