കമന്റടിച്ച യുവാവിനെ വനിതാ എസ്ഐ തല്ലിവീഴ്ത്തി
ഭോപ്പാല്: സ്കൂള് വിദ്യാര്ഥികളെ മാസങ്ങളായി കമന്റടിച്ചു വന്ന യുവാവിനെ വനിതാ എസ് ഐ കയ്യോടെ പിടികൂടി. പിടികൂടുക മാത്രമല്ല, സാമാന്യം മോശമല്ലാത്ത രീതിയില് കൈകാര്യം ചെയ്യുകയും ചെയ്തു. യുവാവ് ഉപദ്രവിച്ച പെണ്കുട്ടികളെക്കൊണ്ടും കമന്റടിക്കാരന്റെ ദേഹത്ത് കൈ വെപ്പിച്ചിട്ടേ ഈ പോലീസ് സബ് ഇന്സ്പെക്ടര് അടങ്ങിയുള്ളൂ.
മധ്യപ്രദേശിലെ സേന്ധ്വയിലാണ് സംഭവം നടന്നത്. യുവാവിന്റെ അശ്ലീല കമന്റുകള് കൊണ്ട് പൊറുതിമുട്ടിയാണ് പെണ്കുട്ടികള് പരാതിയുമായി സബ് ഇന്സ്പെക്ടറായ മോണിക്ക സിംഗിന് അരികിലെത്തിയത്. സ്റ്റേഷനിലേക്ക് പുതുതായി സ്ഥലം മാറിയെത്തിയതായിരുന്നു മോണിക്ക സിംഗ്. വ്യാഴാഴ്ച രാവിലെ പെണ്കുട്ടികളെ തുറിച്ചുനോക്കുകയും കമന്റടിക്കുകയും ചെയ്ത യുവാവിനെ സിംഗ് കയ്യോടെ പിടികൂടുകയായിരുന്നു.
പിടികൂടി സ്റ്റേഷനിലേക്ക് കൊണ്ടുപോകുകയല്ല, ആളുകളുടെ മുന്നില് വെച്ച് ചുട്ട അടി വെച്ചുകൊടുക്കുകയായിരുന്നു മോണിക്ക സിംഗ് ചെയ്തത് എന്ന് ഭാസ്കര് ഡെയ്ലി റിപ്പോര്ട്ട് ചെയ്യുന്നു. എസ് ഐക്ക് പിന്നാലെ പെണ്കുട്ടികളും യുവാവിനെ അടിച്ചു. എന്നിട്ടും പോരാതെ യുവാവിനെക്കൊണ്ട് പെണ്കുട്ടികളുടെ കാല് പിടിപ്പിക്കുകയും ചെയ്തത്രേ.
പിന്നീട് പൊലീസ് കേസെടുത്ത് യുവാവിനെ കോടതിയില് ഹാജരാക്കി. തെറ്റ് ചെയ്തിട്ടുണ്ടെങ്കിലും യുവാവിനെ പരസ്യമായി മര്ദ്ദിക്കുകയും പെണ്കുട്ടികളെക്കൊണ്ട് അടിപ്പിക്കുകയും ചെയ്തത് എന്തിനാണ് എന്നാണ് ആളുകള് ചോദിക്കുന്നത്. യുവാവിനെക്കൊണ്ട് പെണ്കുട്ടികളുടെ കാല് പിടിപ്പിച്ചതും വിവാദമായിട്ടുണ്ട്.