ദില്ലിയിലെ ചുംബന വിവാദം; വെട്ടിലായത് പോലീസ്; ചുംബിച്ചത് സുഹൃത്തെന്ന് പെണ്‍കുട്ടികളും

ദില്ലി: പെണ്‍കുട്ടികളെ ചുംബിക്കുകയും ശേഷം ഓടിമറയുകയും ചെയ്ത് ഇവയുടെ വീഡിയോ ചിത്രീകരിച്ച് യൂട്യൂബിലിടുകയും ചെയ്ത സംഭവത്തില്‍ വെട്ടിലായത് പോലീസ്. യുവാവ് ചുംബിച്ചത് പെണ്‍സുഹൃത്തുക്കളെ അവരുടെ സമ്മതത്തോടുകൂടിയാണെന്ന് പെണ്‍കുട്ടികള്‍ തന്നെ വെളിപ്പെടുത്തി. കേസില്‍ പിടിയിലായ സുമിത്തും സഹൃത്തും ഇതേകാര്യം നേരത്തെ പോലീസിനോട് പറഞ്ഞിരുന്നു.

യൂ ട്യബില്‍ സ്വന്തമായി ചാനലുള്ള സുമിത്ത് കുമാര്‍ ആണ് ചാനലിന്റെ പ്രചരണത്തിനുവേണ്ടി ഇത്തരമൊരു വീഡിയോ ചിത്രീകരിച്ചത്. സംഭവം സോഷ്യല്‍ മീഡിയയില്‍ വിവാദമായതോടെ പീഡനക്കേസില്‍ സുമിത്തിനെ അറസ്റ്റ് ചെയ്യണമെന്ന ആവശ്യവും ഉയര്‍ന്നു. ഇതിന് പിന്നാലെ പെണ്‍കുട്ടികളെ ചുംബിച്ച സുമിത്തിനെയും ഇത് ചിത്രീകരിച്ച സുഹൃത്തിനെയും പോലീസ് പിടികൂടുകയും ചെയ്തു.

എന്നാല്‍, പെണ്‍കുട്ടികളുടെ സമ്മതത്തോടെ തമാശയ്ക്ക് ചെയ്തതാണ് വീഡിയോ എന്നാണ് ഇവര്‍ മൊഴി നല്‍കിയത്. ഇതേ മൊഴി പെണ്‍കുട്ടികളും ആവര്‍ത്തിച്ചതോടെ പോലീസിന് കേസ് ഒഴിവാക്കുകയല്ലാതെ മറ്റുവഴിയില്ല. വീഡിയോയില്‍ ഉള്‍പ്പെട്ട ഒരു പെണ്‍കുട്ടിയെ പോലീസ് ചൊവ്വാഴ്ച ചോദ്യം ചെയ്തിരുന്നു. സുമിത്ത് തന്റെ സുഹൃത്താണെന്നും സമ്മതത്തോടെയാണ് ചുംബിച്ചതെന്നും പെണ്‍കുട്ടി പറഞ്ഞു.

സംഭവത്തില്‍ ഒരിക്കല്‍ക്കൂടി എല്ലാവരില്‍ നിന്നും മൊഴിയെടുക്കേണ്ടതുണ്ടെന്ന് പോലീസ് പറഞ്ഞു. എല്ലാവരെയും ഒരുമിച്ചിരുത്തി മൊഴിയെടുക്കാനാണ് പോലീസ് തീരുമാനം. ഇതിനുശേഷം മാത്രമേ കേസുമായി മുന്നോട്ടുപോകുന്നകാര്യം തീരുമാനിക്കുകയുള്ളൂവെന്ന് ദില്ലി ക്രൈംബ്രാഞ്ച് പോലീസ് അറിയിച്ചു.

English summary

YouTube ‘kissing prankster’ Sumit faces police again, girls say he’s their friend