ഇന്തോനേഷ്യന് വിമാനത്തിന്റെ ഭാഗങ്ങള് കടലില് കണ്ടെത്തി
ജക്കാര്ത്ത: അപ്രത്യക്ഷമായ എയര്ഏഷ്യ വിമാനത്തിന്റെ അവശിഷ്ടങ്ങള് കണ്ടെത്തിയതായി റിപ്പോര്ട്ട്. നങ്ക ദ്വീപിനടുത്തായാണ് വിമാനത്തിന്റേതെന്ന് കരുതന്ന വസ്തുക്കള് കണ്ടെത്തിയതെന്നാണ് ഇന്തോനേഷ്യന് അധികൃതര് പറയുന്നത്.
തിരച്ചിലിനായി രംഗത്തെത്തിയ ഓസ്ട്രേലിയന് വിമാനമാണ് അവശിഷ്ടങ്ങള് കണ്ടത്. എന്നാല് ഇക്കാര്യത്തില് സമ്പൂര്ണമായ ഒരു സ്ഥിരീകരണം ഇപ്പോഴും വന്നിട്ടില്ല.
ജക്കാര്ത്ത എയര്ഫോഴ്സ് ബേസ് കമാണ്ടന്റ് റിയര് മാര്ഷല് ദ്വി പുത്രാന്തോ ആണ് ഈ വിവരം പുറത്ത് വിട്ടത്. ഓസ്ട്രേലിയയുടെ ഓറിയോണ് വിമാനമാണ് തിരച്ചിലിനിടെ വിമാനത്തിന്റേതെന്ന് സംശയിക്കുന്ന അവശിഷ്ടങ്ങള് കണ്ടെത്തിയത്.
ഏയര്ഏഷ്യയുടെ ക്യൂസെഡ് 8501 വിമാനം എയര് ട്രാഫിക് കണ്ട്രോളുമായി ഏറ്റവും ഒടുവില് ബന്ധപ്പെട്ട സ്ഥലം നങ്ക ദ്വീപിനടുത്താണെന്നാണ് വിവരം. അതുകൊണ്ട് തന്നെ കണ്ടെത്തിയത് വിമാനത്തിന്റെ ഭാഗങ്ങള് തന്നെ ആകാനിടയുണ്ടെന്നും വിലയിരുത്തപ്പെടുന്നുണ്ട്.
ഈ മേഖലയില് ഇപ്പോഴും കാലാവസ്ഥ അനുകൂലമല്ല. ഇന്തോനേഷ്യയില് നിന്നുള്ള തിരച്ചില് സംഘം നങ്ക ദ്വീപിലേക്ക് പുറപ്പെട്ടിട്ടുണ്ടെങ്കിലും മോശം കാലാവസ്ഥ പ്രതികൂല അന്തരീക്ഷം സൃഷ്ടിക്കുന്നുണ്ട്.
ഡിസംബര് 28 ന് രാവിലെ ആണ് യാത്രക്കാരും ജീവനക്കാരും അടക്കം 162 പേരുമായി എയര്ഏഷ്യയുടെ ക്യുസെഡ് 8501 വിമാനം അപ്രത്യക്ഷമായത് .