ദക്ഷിണാഫ്രിക്കന് പര്യടനം; അര്ജുന് തെണ്ടുല്ക്കര് ക്യാപ്റ്റന്
മുംബൈ: ബാറ്റിംഗ് ഇതിഹാസം സച്ചിന് തെണ്ടുല്ക്കറുടെ മകനും ഓള്റൗണ്ടറുമായ അര്ജുന് തെണ്ടുല്ക്കര് ദക്ഷിണാഫ്രിക്കന് പര്യടനത്തിനുള്ള മുംബൈ ക്ലബിനെ നയിക്കും. വോര്ളി സി സിയുടെ അണ്ടര് 18 ടീമിനാണ് ജൂനിയര് തെണ്ടുല്ക്കര് നായകനാകുന്നത്. നവംബര് 22 നാണ് കളികള് തുടങ്ങുക.
ദക്ഷിണാഫ്രിക്കയില് അര്ജുന് തെണ്ടുല്ക്കറിന് ഇത് രണ്ടാമൂഴമാണ്. നേരത്തെ വോര്ളി സി സിയുടെ മുന് പര്യടനത്തില് മികച്ച പ്രകടനം നടത്തിയ അര്ജുന് ടോപ് സ്കോററായിട്ടാണ് തിരിച്ചുവന്നത്. മനോഹരമായ ചില ഇന്നിംഗ്സുകളും അര്ജുന് അവിടെ കളിച്ചു.
ജോഹന്നാസ്ബര്ഗ്, പ്രിട്ടോറിയ, പോച്ചെഫ്സട്രൂം എന്നിവിടങ്ങളിലെ സ്കൂളുകള്ക്കെതിരെ 10 ലിമിറ്റഡ് ഓവര് മത്സരങ്ങളാണ് പരമ്പരയില് ഉള്ളത്. ഫാസ്റ്റും ബൗണ്സുമുള്ള വിദേശ പിച്ചുകളില് കുട്ടികള്ക്ക് മത്സര പരിചയം കിട്ടാനാണ് ഇത്തരം പര്യടനങ്ങള് സംഘടിപ്പിക്കുന്നതെന്ന് വോര്ളി സി സിയുടെ അവിനാശ് കാദം പറഞ്ഞു.
സച്ചിന് തെണ്ടുല്ക്കറിന്റെ മകനായ അര്ജുന് തെണ്ടുല്ക്കര് ശ്രദ്ധിക്കപ്പെട്ടുവരുന്ന ഓള്റൗണ്ടറാണ്. ഇടംകൈയ്യന് ബാറ്റ്സ്മാനായ അര്ജുന് മുംബൈ ധിരുഭായ് അംബാനി സ്കൂളിലാണ് പഠിക്കുന്നത്. കഴിഞ്ഞ മാസം 42 പന്തില് നിന്നും 118 റണ്സടിച്ചിരുന്നു. 16 വയസ്സില് താഴെയുള്ളവരുടെ ടൂര്ണമെന്റിലായിരുന്നു അര്ജുന്റെ ഈ പ്രകടനം.
അന്ന് അര്ജുന്റെ കളി കണ്ട് സന്തോഷവാനായ സച്ചിന് ട്വിറ്ററിലും ഫേസ്ബുക്കിലും വാര്ത്ത ഷെയര് ചെയ്തിരുന്നു. 15 കാരനായ അര്ജുന് തെണ്ടുല്ക്കര് പക്ഷേ അച്ഛനെപ്പോലെ വലം കൈയ്യന് ബാറ്റ്സ്മാനല്ല. ഇടംകൈ ബാറ്റിംഗിലാണ് അര്ജുന്റെ സ്പെഷലൈസേഷന്. സച്ചിനെ പോലെ സ്പിന്നറുമല്ല അര്ജുന്. മീഡിയം പേസാണ് ജൂനിയര് തെണ്ടുല്ക്കറിന് വശം.