പാറമടയില്‍ വെള്ളം തുറന്നുവിട്ടു!! മുറ്റത്ത് കളിച്ചുകൊണ്ടിരുന്ന കുഞ്ഞ് ഒഴുക്കില്‍പ്പെട്ടു മരിച്ചു

ഇന്നാണ് കുഞ്ഞിന്റെ മൃതദേഹം കണ്ടെത്തിയത്‌

പത്തനംതിട്ട: ഒന്നര വയസ്സുകാരന്‍ ഒഴുക്കില്‍പ്പെട്ട് മരിച്ചു. വീട്ടുമുറ്റത്ത് കളിച്ചുകൊണ്ടിരുന്ന കുഞ്ഞാണ് ഒഴുക്കില്‍പ്പെട്ടു മരിച്ചത്. വള്ളിക്കോട്-കോട്ടയം തുണ്ടിയില്‍ തെക്കേതില്‍ ജിനു-വിദ്യ ദമ്പതികളുടെ മകന്‍ ആദിദേവിനെയാണ് മരണം തട്ടിയെടുത്തത്. ശനിയാഴ്ച രാവിലെ 11 മണിയോടെ കാണാതായ കുഞ്ഞിനെ ഇന്നു മരിച്ച നിലയില്‍ കണ്ടെത്തുകയായിരുന്നു.

ഇവരുടെ വീടിനു സമീപത്തുള്ള പാറമടയില്‍ നിന്നു അപ്രതീക്ഷിതമായി വെള്ളം തുറന്നുവിട്ടിരുന്നു. ഇതു വീടിന്റെ മുറ്റത്തേക്ക് വന്നപ്പോള്‍ കുഞ്ഞ് ഒഴുകിപ്പോയതായിരിക്കാമെന്നാണ് സംശയിക്കുന്നത്. ഇവരുടെ വീട്ടിനു മുന്നിലൂടെ തോടും ഒഴുകുന്നുണ്ട്.

കുഞ്ഞിനെ കാണാതായതിനെ തുടര്‍ന്ന് വിദ്യ സമീപവാസികളെ അറിയിക്കുകയായിരുന്നു. തുടര്‍ന്ന് ഫയര്‍ഫോഴ്‌സും കോന്നി പോലീസും തിരച്ചില്‍ നടത്തിയെങ്കിലും ശനിയാഴ്ച കുഞ്ഞിനെ കണ്ടെത്താന്‍ സാധിച്ചില്ല. ഇവരുടെ വീട്ടിലേക്കുള്ള വഴി അയല്‍ക്കാരന്‍ അടച്ചിരുന്നു. തുടര്‍ന്ന് പുറത്തേക്കു പോവാന്‍ ഈ തോടിനെയാണ് കുടുംബം ആശ്രയിച്ചിരുന്നത്. അയല്‍വാസിക്കെതിരേ പോലീസില്‍ പരാതി നല്‍കിയെങ്കിലും നടപടിയൊന്നും ഉണ്ടായിരുന്നില്ല. ഇതിനു പിറകെയാണ് കുടുംബത്തിന് ഈ ദുരന്തം നേരിട്ടത്.

English summary

Baby missing in pathanamthitta.