ത്രീ സ്റ്റാര് മുതലുള്ള ബാറുകള് ഡിസംബര് 12 വരെ പ്രവര്ത്തിക്കാം
കൊച്ചി: ഫോര് സ്റ്റാര്, ഹെറിറ്റേജ് ബാറുകള് തുറന്ന് പ്രവര്ത്തിക്കാമെന്ന ഹൈക്കോടതി സിംഗിള് ബഞ്ചിന്റെ ഉത്തരവിനെതിരെ സംസ്ഥാന സര്ക്കാര് നല്കിയ ഹര്ജിയില് ഡിവിഷന് ബഞ്ചിന്റെ തിരിച്ചടി. ത്രീ സ്റ്റാര് മുതലുള്ള ബാറുകള്ക്ക് ഡിസംബര് 12 വരെ പ്രവര്ത്തിക്കാമെന്നും ഡിവിഷന് ബഞ്ച് ഉത്തരവിട്ടു.
സര്ക്കാരിന്റെ മദ്യ നയപ്രകാരം സംസ്ഥാനത്ത് ഫൈവ് സ്റ്റാര് ബാറുകള്ക്ക് മാത്രമേ പ്രവര്ത്തനാനുമതി നല്കേണ്ടതുള്ളൂ. എന്നാല് ഹൈക്കോടതിയുടെ സിംഗിള് ബഞ്ച് ഫോര് സ്റ്റാറുകള്ക്കും ഹെറിറ്റേജ് ബാറുകള്ക്കും പ്രവര്ത്തനാനുമതി നല്കുകയായിരുന്നു.
സിംഗിള് ബഞ്ചിന്റെ ഉത്തരവ് സ്റ്റേ ചെയ്യണം എന്നായിരുന്നു സംസ്ഥാന സര്ക്കാരിന്റെ ആവശ്യം. ഇക്കാര്യം കോടതി അംഗീകരിച്ചില്ല. എന്നാല് വിശദമായ വാദം കേള്ക്കാന് കോടതി തയ്യാറായിട്ടുണ്ട്. അന്തിമ വാദം വരെ തങ്ങള്ക്ക് പ്രവര്ത്തിക്കാന് അനുമതി നല്കണം എന്ന ബാറുടമകളുടെ അഭ്യര്ത്ഥന കോടതി അംഗീകരിക്കുകയും ചെയ്തു.
മദ്യ നയത്തില് നിന്ന് പിറകോട്ടില്ലെന്നാണ് സര്ക്കാരിന്റെ ഉറച്ച തീരുമാനം. എന്നാല് സര്ക്കാരിലും പാര്ട്ടിയിലും ഇത് സംബന്ധിച്ച അഭിപ്രായ വ്യത്യാസങ്ങള്ക്ക് ഒരു കുറവും ഇല്ല. മദ്യ വില്പനക്കാരുടെ പണവും വോട്ടും വേണ്ടെന്ന് കെപിസിസി അധ്യക്ഷന് വിഎം സുധീരന് പറഞ്ഞപ്പോള് എതിര്പ്പുമായി രംഗത്തെത്തിയത് മുഖ്യമന്ത്രി നേരിട്ട് തന്നെയായിരുന്നു. മദ്യ നിരോധനമല്ല, മദ്യ വര്ജ്ജനമാണ് വേണ്ടത് എന്ന് യുഡിഎഫ് കണ്വീനര് പിപി തങ്കച്ചന് പറഞ്ഞതും വിവാദമായിരുന്നു.