ആണും പെണ്ണും മാത്രം... ജാതി സെന്സസിലെ മതമില്ലാത്ത ജീവനുകള്
തിരുവനന്തപുരം: 'ലോകത്ത് ഒരു മതമേ ഉള്ളൂ, രണ്ട് ജാതികളേ ഉള്ളൂ... ഒരേയൊരു മതം മനുഷ്യ മതവും, രണ്ട് ജാതികള്- ആണും, പെണ്ണും.' പ്രഖ്യാപിത മതങ്ങളുണ്ടാകുന്നതിന് മുന്പ് കാര്യങ്ങള് ഇങ്ങനെ ആയിരുന്നിരിയ്ക്കണം!
മതത്തിനപ്പുറത്തേയ്ക്ക് മനുഷ്യനെ മനുഷ്യനായി മാത്രം കാണണം എന്നാണ് മിക്കവരും തത്വജ്ഞാനികളെ പോലെ പറയാറുള്ളത്. എന്നാല് പ്രയോഗ തലത്തില് അത് പലപ്പോഴും സംഭവിയ്ക്കാറില്ലെന്ന് മാത്രം.
ജാതി സെന്സസിന്റെ കോലാഹലങ്ങളില് ഹിന്ദുക്കളെത്രെ, മുസ്ലീങ്ങളെത്രെ, ക്രിസ്ത്യാനികളെത്രെ എന്ന് തര്ക്കിയ്ക്കുന്നവര് ഇവരെ കാണാതെ പോകരുത്. ഒരു മതത്തിലും വിശ്വസിയ്ക്കാത്ത ഒരു ചെറിയ സമൂഹം നമുക്കിടയിലുണ്ട്. സര്ട്ടിഫിക്കറ്റുകളില് മതമില്ലെന്നും ജാതിയില്ലെന്നും എഴുതി വച്ച ഒരു കൂട്ടര്.
കേരളത്തിലെ മൊത്തം ജനസംഖ്യ 3,34,06,061 ആണല്ലോ... ഇതില് 88,155 പേര് മതരഹിതരാണ്. അതില് 42,967 പേര് പുരുഷന്മാരും, 45,188 പേര് സ്ത്രീകളും ആണ്.
ശരിയാണ് ഇത് വലിയ സംഖ്യയൊന്നും അല്ല. ദേശീയ തലത്തില് എടുത്താല് ആകെ ജനസംഖ്യയുടെ 0.29 ശതമാനം മാത്രമാണ് മതവും ജാതിയും വേണ്ട എന്ന് തീരുമാനമെടുത്ത് ജീവിയ്ക്കുന്നത്.
ജാതിയും മതവും എല്ലാം ആനുകൂല്യങ്ങള്ക്കും അവകാശങ്ങള്ക്കും സംഘം ചേരലിനും ഒക്കെ ആയി ഉപയോഗിയ്ക്കുന്ന ഒരു രാജ്യത്താണ് ഇങ്ങനെ ചിലര് ഉള്ളത് എന്ന് കൂടി ഓര്ക്കണം. കേരളത്തില് ഹിന്ദു-മുസ്ലീം-ക്രിസ്ത്യന് മതവിഭാഗക്കാര് കഴിഞ്ഞ ഏറ്റവും അധികം ഉള്ളത് ഈ മതരഹിതരാണെന്നുകൂടി മനസ്സില് വയ്ക്കാം.
കഴിഞ്ഞ സെന്സസിനെ അപേക്ഷിച്ച് ജാതിയും മതവും ഇല്ലാതെ ജീവിയ്ക്കുന്നവരുടെ ശതമാനത്തിലെ വര്ദ്ധന കേട്ടാല് ഒരുപക്ഷേ നിങ്ങള് അമ്പരന്നേയ്ക്കും. അത് 294 ശതമാനമാണ്.