സര്ക്കാരിന് തിരിച്ചടി; ബാറുകള് തുറക്കാന് കോടതി ഉത്തരവ്
കൊച്ചി: സംസ്ഥാന സര്ക്കാരിന് കനത്ത തിരിച്ചടി നല്കിക്കൊണ്ട് ഹൈക്കോടതി ഡിവിഷന് ബഞ്ചിന്റെ ഉത്തരവ്. സിംഗിള് ബഞ്ചിന്റെ ഉത്തരവിനെ തുടര്ന്ന് പൂട്ടിയ 250 ബാറുകളും തുറക്കാനാണ് കോടതിയുടെ ഉത്തരവ്.
കഴിഞ്ഞ ദിവസം ഹൈക്കോടതി സിംഗിള് ബഞ്ചായിരുന്നു കഴിഞ്ഞ ദിവസം ടു സ്റ്റാര്, ത്രീ സ്റ്റാര് ബാറുകള് അടക്കാന് ഉത്തരവിട്ടത്. ഫൈവ് സ്റ്റാര് ബാറുകള്ക്ക് മാത്രം പ്രവര്ത്തനാനുമതി നല്കുന്നതായിരുന്നു സര്ക്കാരിന്റെ തീരുമാനം. എന്നാല് ഫോര് സ്റ്റാറുകള്ക്ക് കൂടി ബാര് പ്രവര്ത്തിപ്പിക്കാമെന്നാണ് കോടതി പറഞ്ഞിരുന്നത്.
തങ്ങളുടെ വാദം കേട്ടില്ലെന്നാണ് ബാര് ഉടമകള്ക്ക് വേണ്ടി കോടതിയില് ഹാജരായ സുപ്രീം കോടതി അഭിഭാഷകന് വെങ്കട്ടരാമന് ഉന്നയിച്ചത്. ഇക്കാര്യം ഡിവിഷന് ബഞ്ച് അംഗീകരിക്കുകയായിരുന്നു. സിംഗിള് ബഞ്ച് വിധി വന്നതുമുതല് ഒരു മാസം തല്സ്ഥിതി തുടരാനാണ് കോടതിയുടെ ഉത്തരവ്.
സിംഗിള് ബഞ്ചിന്റെ ഉത്തരവിനെ തുടര്ന്ന് ഒക്ടോബര് 31 ഉച്ചയോട് കൂടി 250 ബാറുകള് സംസ്ഥാന സര്ക്കാര് പൂട്ടി സീല് വച്ചിരുന്നു. ഇവിടങ്ങളിലെ മദ്യം സര്ക്കാര് ഏറ്റെടുക്കാന് തീരുമാനിക്കുകയും ചെയ്തിരുന്നു.
എന്നാല് പുതിയ ഉത്തരവ് പ്രകാരം പൂട്ടിയ ബാറുകളെല്ലാം തുറക്കാനുള്ള സൗകര്യം സര്ക്കാര് തന്നെ ചെയ്ത് നല്കേണ്ടി വരും. വിധി ദൗര്ഭാഗ്യകരമായെന്നാണ് എക്സൈസ് മന്ത്രി കെ ബാബു പ്രതികരിച്ചത്.