ജെസി ഡാനിയേല് പുരസ്കാര നിറവില് ഐവി ശശി
തിരുവനന്തപുരം: ഐ.വി ശശി എന്ന സംവിധായക പ്രതിഭയ്ക്ക് ജെ.സി ഡാനിയേല് പുരസ്കാരം. നാലു പതിറ്റാണ്ടുകള് നീണ്ടുനിന്ന ചലച്ചിത്ര ജീവിതത്തില് മലയാള സിനിമയ്ക്ക് ശശിയേട്ടന് ഒട്ടേറെ സംഭാവനകള് നല്കിയിട്ടുണ്ട്. മലയാള സിനിമയ്ക്ക് നല്കിയ സമഗ്ര സംഭാവനകള് പരിഗണിച്ചാണ് 2014ലെ ജെ.സി ഡാനിയേല് പുരസ്കാരം അദ്ദേഹത്തിനു നല്കിയത്.
കഴിഞ്ഞ വര്ഷം എം.ടി വാസുദേവന് നായരായിരുന്നു ജെ.സി ഡാനിയേല് പുരസ്കാരം കരസ്ഥമാക്കിയത്. 1992 മുതലാണ് മലയാള സിനിമയുടെ പിതാവ് എന്നറിയപ്പെടുന്ന ജെ.സി ഡാനിയേലിന്റെ പേരില് സംസ്ഥാന സര്ക്കാര് പുരസ്കാരം നല്കാന് തുടങ്ങിയത്. ഈ പുരസ്കാരത്തിന് എന്തുകൊണ്ടും ഐ.വി ശശി അര്ഹനാണ്. 27ാം വയസില് സംവിധാന രംഗത്തേക്ക് കടന്നുവന്നയാളാണ് ഐവി ശശി.
150ഓളം ചിത്രങ്ങള്
കലാസംവിധായകനായി സിനിമയില് അരങ്ങേറ്റം കുറിച്ച ഐവി ശശി 27ാം വയസിലാണ് സിനിമ സ്വന്തമായി സംവിധാനം ചെയ്യുന്നത്. നാലു പതിറ്റാണ്ടുകള് നീണ്ടുനിന്ന ചലച്ചിത്ര ജീവിതത്തില് 150ഓളം ചിത്രങ്ങള് സംവിധാനം ചെയ്തിട്ടുണ്ട്.
ഉത്സവത്തോടെ തുടക്കം
ഉത്സവം എന്ന ചിത്രമാണ് ആദ്യം സംവിധാനം ചെയ്തത്. അവളുടെ രാവുകള്, തൃഷ്ണ, അഹിംസ, ആള്ക്കൂട്ടത്തില് തനിയെ, അടിയൊഴുക്കുകള്, ഇണ, മൃഗയ, ദേവാസുരം,ആരൂഢം തുടങ്ങി ഒട്ടേറെ ചിത്രങ്ങള് മലയാളത്തിന് സമ്മാനിച്ചു.
ഒട്ടേറെ പുരസ്കാരങ്ങള്
ഒട്ടേറെ പുരസ്കാരങ്ങള് വാരി കൂട്ടിയ സംവിധായകന് കൂടിയാണ് ഐവി ശശി. 1982ല് ആരൂഢം എന്ന ചിത്രത്തിനു മികച്ച ചിത്രത്തിനുള്ള നര്ഗിസ് ദത്ത് ദേശീയ പുരസ്കാരം ലഭിച്ചിട്ടുണ്ട്. ഒട്ടേറെ തവണ മികച്ച സംവിധായകനുള്ള പുരസ്കാരങ്ങളും നേടി.
താരരാജാക്കന്മാരെ വളര്ത്തിയെടുത്ത ശശിയേട്ടന്
മലയാളത്തിലെ താരരാജാക്കന്മാരായ മമ്മൂട്ടിയെയും മോഹന്ലാലിനെയും വളര്ത്തിയെടുത്തത് ഐ.വി ശശിയായിരുന്നു. ഇദ്ദേഹത്തിന്റെ സിനിമയില് ഒരവസരം ലഭിക്കാന് ലാലും മമ്മൂക്കയും ഒരുപാട് നടന്നിട്ടുണ്ട്.