വീരേന്ദ്രകുമാര് ജെഡിയുവില് നിന്നും പുറത്തേക്ക് ?? എസ്ജെഡി വീണ്ടും സജീവമാവുമെന്ന് സൂചന
പ്രചരിക്കുന്ന വാര്ത്തകളെക്കുറിച്ച് വീരേന്ദ്രകുമാര് ഇതുവരെ പ്രതികരിച്ചിട്ടില്ല.
തിരുവനന്തപുരം : ജനതാദള് യുവില് നിന്ന് എം പി വീരേന്ദ്രകുമാറിനെ മാറ്റുന്നതിനായി ദേശീയതലത്തില് നീക്കം നടക്കുന്നുവെന്ന് റിപ്പോര്ട്ടുകള്. മഹാസഖ്യം പൊളിഞ്ഞതിന് പിന്നാലെ ബിജെപി പിന്തുണയോടെ നിതീഷ് കുമാര് വീണ്ടും മുഖ്യമന്ത്രിയായി അധികാരമേറ്റിരുന്നു. എന്നാല് ഈ തീരുമാനത്തില് തന്റെ അതൃപ്തി വീരേന്ദ്രകുമാര് വ്യക്തമാക്കിയിരുന്നു. ഇതേത്തുടര്ന്നാണ് അദ്ദേഹത്തെ പുറത്താക്കാനുള്ള നീക്കം നടക്കുന്നത്.പ്രചരിക്കുന്ന വാര്ത്തകളെക്കുറിച്ച് വീരേന്ദ്രകുമാര് ഇതുവരെ പ്രതികരിച്ചിട്ടില്ല.
വീരേന്ദ്രകുമാറിനെ പാര്ട്ടിയില് നിന്നും പുറത്താക്കാന് തീരുമാനിച്ചിട്ടില്ലെന്നാണ് നേതാക്കള് വ്യക്തമാക്കുന്നത്. തുടരുന്നതിനെക്കുറിച്ചുള്ള തീരുമാനമെടുക്കേണ്ടത് അദ്ദേഹമാണെന്നും അവര് പറയുന്നു. രാജ്യസഭയില് അദ്ദേഹത്തിന് വിപ്പ് നല്കില്ലെന്ന് നിതീഷ് കുമാറിനോട് അടുത്ത വൃത്തങ്ങള് അറിയിച്ചിരുന്നു. നിതീഷുമായി ഇടഞ്ഞ് നില്ക്കുന്ന നേതാക്കള്ക്കെതിരെ നേരത്തെയും നടപടി സ്വീകരിച്ചിരുന്നു.
പഴയ എസ്ജെഡി പൊടി തട്ടിയെടുക്കാന് വീരേന്ദ്രകുമാര് ശ്രമിക്കുന്നുണ്ടെന്ന തരത്തിലുള്ള വാര്ത്തകളും പ്രചരിക്കുന്നുണ്ട്. 2009 ല് കോഴിക്കോട് സീറ്റുമായി ബന്ധപ്പെട്ടണ്ടായ തര്ക്കത്തെ തുടര്ന്നാണ് എസ്ജെഡി രൂപീകരിച്ചത്. എല്ഡി എഫില് നിന്നും തെറ്റിപ്പിരിഞ്ഞാണ് വീരേന്ദ്രകുമാര് അടക്കമുള്ളവര് എസ്ജെഡി രൂപീകരിച്ചത്. യുഡി എഫിലെത്തിയ പാര്ട്ടി 2014 ല് ജെഡിയുവില് ലയിച്ചിരുന്നു.