കൊച്ചി മെട്രോയ്ക്ക് പ്രിയമേറുന്നു!! അവധി ദിനങ്ങളിൽ ഇടവേള കുറച്ച് സർവീസ് കൂട്ടുന്നു!!
മെട്രോയിൽ യാത്ര ചെയ്യാനെത്തുന്ന ആർക്കും ഒരു ബുദ്ധിമുട്ടും നിരാശയും ഉണ്ടാകാൻ പാടില്ലെന്നും അതിനാൽ അധിക സർവീസ് ഉൾപ്പെടെയുള്ള എല്ലാം യാത്രക്കാർക്കായി നൽകും
കൊച്ചി: അവധി ദിനങ്ങളിലെ തിരക്ക് കണക്കിലെടുത്ത് കൊച്ചി മെട്രോ അധിക സർവീസിനൊരുങ്ങുന്നു. ഇടവേള കുറച്ച് സർവീസ് കൂട്ടാനാണ് കെഎംആർഎൽ പദ്ധതിയിട്ടിരിക്കുന്നത്. മെട്രോ സർവീസ് ആരംഭിച്ച ആദ്യ ഞായറാഴ്ചയായ ഇന്നും അവധി ദിനമായ തിങ്കളാഴ്ചയും അധിക സർവീസ് ഉണ്ടാകും. തിരക്ക് കണക്കിലെടുത്താണ് അധിക സർവീസിന് ഒരുങ്ങുന്നത്. അവധി ദിവസമായതിനാൽ രണ്ട് ദിവസവും മെട്രോയിൽ യാത്ര ചെയ്യാൻ നിരവധി പേർ എത്തുമെന്നാണ് പ്രതീക്ഷിക്കുന്നത്.
മെട്രോയിൽ യാത്ര ചെയ്യാനെത്തുന്ന ആർക്കും ഒരു ബുദ്ധിമുട്ടും നിരാശയും ഉണ്ടാകാൻ പാടില്ലെന്നും അതിനാൽ അധിക സർവീസ് ഉൾപ്പെടെയുള്ള എല്ലാം യാത്രക്കാർക്കായി നൽകും ഇതിനായി എല്ലാ മുൻകരുതലും കെഎംആർഎൽ എടുത്തിട്ടുണ്ട്.
നിലവിൽ രാവിലെ ആറ് മണി മുതലാണ് മെട്രോ സർവീസ് ആരംഭിക്കുന്നത്. രാത്രി 10 മണി വരെ സർവീസ് ഉണ്ടാകും. കൂടാതെ ഒമ്പത് മിനിറ്റ് ഇടവേളയിൽ 219 ട്രിപ്പുകളാണ് ഉണ്ടാവുക. മാത്രമല്ല ആറ് ട്രെയിനുകളാണ് സാധാരണ ഗതിയിൽ സർവീസ് നടത്തുന്നത്. ഒരെണ്ണം അടിയന്തര ഘട്ടത്തിനായി മാറ്റിയിട്ടിട്ടുണ്ട്.
എന്നാൽ ഞായർ തിങ്കൾ ദിവസങ്ങളിൽ രാവിലെ എട്ട് മണിക്കായിരിക്കും മെട്രോ സർവീസ് ആരംഭിക്കുക. ഏഴ് മിനിറ്റ് ഇടവേളയിലായിരിക്കും സർവീസ്. കൂടാതെ എട്ട് ട്രെയിനുകള് ഈ ദിവസങ്ങളിൽ ട്രാക്കിലുണ്ടാകും. കഴിഞ്ഞ ശനിയാഴ്ചയാണ് കൊച്ചി മെട്രോ ഉദ്ഘാടനം ചെയ്തത്. തിങ്കളാഴ്ച മുതലാണ് ജനങ്ങൾക്ക് യാത്ര സജ്ജമാക്കിയത്. പ്രധാനമന്ത്രി നരേന്ദ്ര മോദിയാണ് കൊച്ചി മെട്രോ ഉദ്ഘാടനം ചെയ്തത്.