വീട്ടുവേലക്കാരിയെ പീഡിപ്പിച്ചകേസില് മദ്ധ്യവയസ്കന് അറസ്റ്റില്
നാദാപുരം: ജോലിക്കുനിന്ന വീട്ടില് നിന്നും പിണങ്ങി വീടുവിട്ട തമിഴ്നാട്ടുകാരിയായ പെണ്കുട്ടിയെ പീഡിപ്പിച്ച കേസില് മദ്ധ്യവയസ്കന് അറസ്റ്റിലായി. എടച്ചേരി കച്ചേരി സ്വദേശി കല്ലുകൊത്തിയില് അശോകനാ(52)ണ് 18 കാരിയായ പെണ്കുട്ടിയെ പീഡിപ്പിച്ചകേസില് അറസ്റ്റിലായത്. പീഡിനത്തിനുശേഷം റോഡിലുപേക്ഷിച്ച പെണ്കുട്ടിയെ പോലീസ് ആണ് ആശുപത്രിയില് എത്തിച്ചത്.
ഡിസംബര് 23നാണ് കേസിനാസ്പദമായ സംഭവം നടക്കുന്നത്. പെരിങ്ങത്തൂര് കായിപ്പനച്ചി പുളിയ നമ്പ്രം ബാലന്പീടികക്കു സമീപത്തെ ഒരു വീട്ടിലെ ജോലിക്കാരിയായിരുന്നു പെണ്കുട്ടി. വീട്ടുടമയായ സ്ത്രീയുമായി വേലക്കാരി വഴക്കിടുകയും രാത്രിതന്നെ വീടുവിട്ടറങ്ങുകയുമായിരുന്നു. വഴിയില്വെച്ച് അശോകന് തന്റെ ബൈക്കില് പെണ്കുട്ടിക്ക് ലിഫ്റ്റ് നല്കി.
തുടര്ന്ന് പ്രതിയുടെ വീട്ടിലേക്ക് കൊണ്ടുപോയി പീഡിപ്പിച്ചശേഷം പുറമേരി വെള്ളൂര് റോഡില് ഉപേക്ഷിക്കുകയായിരുന്നെന്ന് പോലീസ് പറഞ്ഞു. നാദാപുരം പൊലീസ് കണ്ട്രോള് റൂമിന്റെ വണ്ടി അതുവഴി കടന്നുപോകവെ പെണ്കുട്ടിയെ അവശനിലയില് കണ്ടെത്തുകയായിരുന്നു. പെണ്കുട്ടിയെ ഉടന് വടകര വനിതാ സെല്ലിലെത്തിക്കുകയും വൈദ്യപരിശോധനയ്ക്ക് വിധേയയാക്കുകയും ചെയ്തു.
പെണ്കുട്ടി പീഡനത്തിനിരയായെന്ന് വ്യക്തമായിട്ടുണ്ട്. ആശുപത്രിയില് വെച്ച് യുവതി നല്കിയ മൊഴിയുടെ അടിസ്ഥാനത്തിലാണ് പ്രതിയെ കണ്ടെത്തിയത്. പെണ്കുട്ടിയെ കൊണ്ടുപോകാനുപയോഗിച്ച ബൈക്കും പോലീസ് കസ്റ്റഡിയിലെടുത്തു. പെണ്കുട്ടി ജോലിക്കുനിന്ന വീട്ടുകാരില് നിന്നും പോലീസ് മൊഴിയെടുത്തിട്ടുണ്ട്.