ഒന്നും വെളിപ്പെടുത്തിയിട്ടില്ല; എല്ലാം കെട്ടുകഥകളെന്ന് രൂപേഷിന്റെ മകള് ആമി
കൊച്ചി: അച്ഛനും അമ്മയും പിടിയിലായ മറ്റുള്ളവരും പോലീസ് ചോദ്യം ചെയ്യലില് ഒന്നും വെളിപ്പെടുത്തിയിട്ടില്ലെന്ന് രൂപേഷിന്റെ മകള് ആമി. രൂപേഷിനെയും ഷൈനയേയും കൊച്ചിയിലെ സിബിഐ കോടതിയില് ഇന്ന് ഹാജരാക്കിയിരുന്നു. ഇതിനുശേഷം മാധ്യമപ്രവര്ത്തരോട് പ്രതികരിക്കുകയായിരുന്നു രൂപേഷിന്റെയും ഷൈനയുടെയും മൂത്തമകള് ആമി.
തങ്ങളെ കൊലപ്പെടുത്തുമെന്ന് പോലീസ് ഭീഷണിപ്പെടുത്തുന്നുണ്ടെന്ന് രൂപേഷ് പറഞ്ഞതായി ആമി ആവര്ത്തിച്ചു. കാട്ടില് തെളിവെടുപ്പിന് കൊണ്ടുപോകുമ്പോള് കൊലപ്പെടുത്തുമെന്നാണ് ഭീഷണി. നേരത്തെയും ഇവര്ക്ക് വധഭീഷണി ഉണ്ടായതായി ആമി മാധ്യമങ്ങളെ അറിയിച്ചിരുന്നു. കൊയമ്പത്തൂര് കോടതിയില് ഹാജരാക്കിയപ്പോള് അനുജത്തിക്കൊപ്പം മാതാപിതാക്കളുമായി ആമി കൂടിക്കാഴ്ച നടത്തിയിരുന്നു.
കൊയമ്പത്തൂര്വെച്ച് അറസ്റ്റിലായ മാവോയിസ്റ്റുകളെ ഇതാദ്യമായാണ് കേരളത്തിലേക്ക് കൊണ്ടുവരുന്നത്. കൊച്ചി സിബിഐ കോടതിയില് ഹാജരാക്കിയ ഇവര്ക്കെതിരെ യുഎപിഎ ചുമത്തി. നക്സല് നേതാവ് മല്ലരാജറെഡ്ഢിക്കും ഭാര്യക്കും ഒളിവില് താമസിക്കാന് സൗകര്യം ഏര്പ്പെടുത്തിയെന്ന കേസിലാണ് യുഎപിഎ. അടുത്തമാസം മൂന്നുവരെ ഇവരെ റിമാന്ഡ് ചെയ്യുകയും ചെയ്തിട്ടുണ്ട്.
വിവിധ കേസുകളുമായി ബന്ധപ്പെട്ട് കര്ണാടകത്തിലെയും കേരളത്തിലെയും കോടതികളില് ഇവര്ക്ക് ഹാജരാകേണ്ടിവരും. മാവോയിസ്റ്റ് അക്രമവുമായി ബന്ധപ്പെട്ട് കേസ് രജിസ്റ്റര് ചെയ്ത പോലീസ് സ്റ്റേഷനുകളുടെ പരിധിയില്പ്പെട്ട കോടതികളിലാണ് ഹാജരാകേണ്ടത്. കേസുകള് ഗൗരവമുള്ളതല്ലെങ്കിലും പലകേസുകളിലായി മാസങ്ങളോളം ജാമ്യമില്ലാതെ ഇവര് ജയിലില് കിടക്കേണ്ടിവരുമെന്നുറപ്പാണ്.