മറുനാടന് മലയാളിയുടെ ഓഫീസിന് നേര്ക്ക് അജ്ഞാതരുടെ ആക്രമണം, പ്രതിഷേധം
തിരുവനന്തപുരം: ഓണ്ലൈന് മാധ്യമമായ മറുനാടന് മലയാളിയുടെ തിരുവനന്തപുരത്തെ ഓഫീസിന് നേര്ക്ക് അജ്ഞാത സംഘത്തിന്റെ ആക്രമണം. സംഭവത്തില് സ്വതന്ത്ര വാര്ത്താ പോര്ട്ടലുകളുടെ കൂട്ടായ്മ പ്രതിഷേധം രേഖപ്പെടുത്തി.
സെപ്തംബര് 4 ന് രാത്രി പത്ത് മണിയ്ക്ക് ശേഷമാണ് ഓഫീസിന് നേര്ക്ക് ആക്രമണം ഉണ്ടായത്. ഓഫീസ് അടച്ചതിന് ശേഷം നടന്ന ആക്രമണത്തെ കുറിച്ച് സെപ്തംബര് അഞ്ചിന് രാവിലെയാണ് അറിയുന്നത്.
സ്ഥാപനത്തിന്റെ ബോര്ഡുകള് അടിച്ചു തകര്ത്തിട്ടുണ്ട്. ഫര്ണീച്ചറുകള് നശിപ്പിക്കാനും ശ്രമം നടന്നിട്ടുണ്ട്. പോലീസ് സ്ഥലത്തെത്തി തെളിവെടുത്തു. പ്രദേശത്ത് സ്ഥാപിച്ച ക്യാമറകളില് നിന്നുള്ള ദൃശ്യങ്ങള് കൂടി പരിശോധിച്ച് നടപടിയെടുക്കുമെന്ന് പോലീസ് അറിയിച്ചു.
മറുനാടന് മലയാളിയുടെ ഓഫീസ് ആക്രമിച്ചതില് സ്വതന്ത്ര വാര്ത്താ പോര്ട്ടലുകളുടെ കൂട്ടായ്മയായ ന്യൂ മീഡിയ എഡിറ്റേഴ്സ് ഗിഡ് പ്രതിഷേധിച്ചു. പരന്പരാഗത മാധ്യമ സ്ഥാപനങ്ങളുടെ പിന്തുണയില്ലാതെ പ്രവര്ത്തിയ്ക്കുന്ന ഓണ്ലൈന് മാധ്യമങ്ങളുടെ കൂട്ടായ്മയാണിത്. വണ്ഇന്ത്യ, മറുനാടന് മലയാളി, ഡൂള് ന്യൂസ്, സൗത്ത് ലൈവ്, ഇ വാര്ത്ത, ന്യൂസ് മൊമന്റ്സ്, കേരളഓണ്ലൈന് ന്യൂസ്, വൈഗ ന്യൂസ് തുടങ്ങിയ വാര്ത്താ പോര്ട്ടലുകളാണ് എഡിറ്റേഴ്സ് ഗില്ഡില് അംഗങ്ങളായുള്ളത്.