സ്വപ്നം കണ്ട് അതുപോലെ പറയാന് ആന്റണിയ്ക്കുള്ള കഴിവ് കൈമോശം വന്നിട്ടില്ല; പിണറായി
കോട്ടയം: ഉമ്മന്ചാണ്ടി സര്ക്കാരിനെക്കുറിച്ച് കോണ്ഗ്രസ് പ്രവര്ത്തക സമിതി അംഗം എകെ ആന്റണി നടത്തിയ പരാമര്ശങ്ങളെ പരിഹസിച്ച് സിപിഎം പൊളിറ്റ് ബ്യൂറോ അംഗം പിണറായി വിജയന്. ആന്റണിയുടെ നിലപാട് അപഹാസ്യമാണെന്നാണ് പിണറായി വിജയന് പറഞ്ഞത്.
നവകേരള മാര്ച്ചിനോട് അനുബന്ധിച്ച് കോട്ടയത്ത് നടത്തിയ വാര്ത്താ സമ്മേളനത്തിലാണ് അദ്ദേഹം ഇക്കാര്യം പറഞ്ഞത്. രാജ്യത്ത് ഇത്രത്തോളം വികസനം ഉണ്ടായ മറ്റൊരു സംസ്ഥാനം ഇല്ലെന്നായിരുന്നു ആന്റണി പറഞ്ഞത്. പൊതുജനത്തിന്റെ സാമന്യബുദ്ധിയെപ്പോലും ചോദ്യം ചെയ്യുന്നതാണ് ആന്ററണിയുടെ പരാമര്ശമെന്നും പിണറായി വിജയന്.
കേരളത്തില് ഭരണത്തുടര്ച്ച ഉണ്ടാകുമെന്ന ആന്ററണിയുടെ വാദം കോണ്ഗ്രസുകാര് പോലും വിശ്വസിയ്ക്കില്ല.യുഡിഎഫ് സര്ക്കാരിനെ ഘടകകക്ഷികള് പോലും കൈവിട്ടെന്നും പിണറായി വിജയന്. സ്വപ്നം കണ്ട് അതുപോലെ പറയാന് ആന്റണിയ്ക്കുള്ള കഴിവ് കൈമോശം വന്നിട്ടില്ലെന്നും പിണറായി വിജയന് പറഞ്ഞു.