കർഷക കരുത്തിന്‌ മുന്നിൽ കേന്ദ്രത്തിന് മുട്ട് മടക്കേണ്ടി വന്നു; ഈ തീ ആളിപ്പടരുക തന്നെ ചെയ്യുമെന്ന് ഐസക്

തിരുവനന്തപുരം; കർഷകരുടെ കരുത്തിന്‌ മുന്നിൽ ഒടുവിൽ കേന്ദ്രസർക്കാരിന് മുട്ടുമടക്കേണ്ടി വന്നുവെന്ന് ധനമന്ത്രി തോമസ് ഐസക്. ഡല്‍ഹി ചലോ മാര്‍ച്ചിന് ഡല്‍ഹിയില്‍ പ്രവേശിക്കാന്‍ അനുമതി നൽകില്ലെന്ന വാശി അധികാരികൾ വിഴുങ്ങി പ്രതിഷേധവുമായി ഇരമ്പിയെത്തിയ കര്‍ഷകരുടെ ഇടിമുഴക്കം രാജ്യതലസ്ഥാനത്തെ പ്രകമ്പനം കൊള്ളിക്കാൻ പോവുകയാണെന്നും അദ്ദേഹം പറഞ്ഞു.

കേന്ദ്ര സര്‍ക്കാരിന്റെ പുതിയ കാര്‍ഷിക നിയമങ്ങള്‍ പിന്‍വലിക്കണമെന്നാവശ്യപ്പെട്ടാണ് ഡല്‍ഹി ചലോ മാര്‍ച്ച്. അധികാരവും മർദ്ദനമുറകളും ഉപയോഗിച്ച് പാവങ്ങളെ പിന്തിരിപ്പിക്കാൻ പരമാവധി ശ്രമിച്ചു നോക്കി. അനേകം നേതാക്കളെ അറസ്റ്റ് ചെയ്‌തു. കോണ്‍ക്രീറ്റ് ബാരിക്കേഡുകളും മുള്‍കമ്പികളും ട്രക്കും കണ്ടെയ്‌നറുകളുമായി പ്രതിഷധേക്കാരെ ദല്‍ഹിയുടെ അതിര്‍ത്തികളില്‍ തടയാന്‍ ശ്രമിച്ചു. പക്ഷേ, ഒന്നും വിലപ്പോയില്ല.

കര്‍ഷകരെ തടയാനായി ഡല്‍ഹി ബഹാദുര്‍ഗ് അതിര്‍ത്തിയില്‍ സ്ഥാപിച്ച ട്രക്ക് ട്രാക്ടറിനോട് ബന്ധിപ്പിച്ച്, പ്രതിഷേധക്കാര്‍ വലിച്ചുനീക്കിയ വീഡിയോ ആവേശത്തോടെയാണ് സമൂഹമാധ്യമങ്ങളിൽ പ്രചരിക്കുന്നത്. ക്രെയ്ന്‍ ഉപയോഗിച്ച് സ്ഥാപിച്ച കണ്ടെയ്നറുകളും കര്‍ഷകര്‍ നീക്കം ചെയ്‌തു. നൂറു കണക്കിന് പ്രതിഷേധക്കാര്‍ അണിനിരന്നായിരുന്നു കണ്ടെയ്നറുകള്‍ ഓരോന്നായി തള്ളി മാറ്റിയത്. മനുഷ്യശക്തിയ്ക്കു മുന്നിൽ ഒരു ബാരിക്കേഡും വിലപ്പോവില്ലെന്ന് ഇനിയും കേന്ദ്രം ഭരിക്കുന്നവർ മനസിലാക്കിയില്ലെങ്കിൽ എന്തു ചെയ്യാനാണ്?

രണ്ടുകൊല്ലം മുമ്പ് മഹാരാഷ്ട്രയിൽ നടന്ന ലോംഗ് മാർച്ചിനെ അനുസ്മരിപ്പിക്കുകയാണ് ഈ സമരം. അന്ന്, നോര്‍ത്ത് മഹാരാഷ്ട്ര, വിദര്‍ഭ, അഹമ്മദ് നഗര്‍ എന്നിവിടങ്ങളില്‍ നിന്നുള്ള കര്‍ഷകരാണ് കിസാൻ സഭയുടെ നേതൃത്വത്തിൽ താനെയില്‍ നിന്നും മുംബൈയിലെ ആസാദ് മൈതാനത്തിലേയ്ക്കാണ് മാർച്ചു ചെയ്തത്.

ഏതാണ്ട് 180 കിലോമീറ്റർ ദൂരം കാൽനടയായി താണ്ടിയ കർഷകർ തങ്ങൾ അനുഭവിക്കുന്ന ദുരിതവും അധികാരികളുടെ അവഗണനയും തുടർച്ചയായ വാഗ്ദാനലംഘനവും ലോകത്തെ അറിയിച്ചു.
ഇന്ത്യയിലെ കർഷകരുടെ ജീവിതം അനുദിനം ദുരിതപൂർണമാകുന്നതുകൊണ്ടാണ് കർഷകർക്ക് ഇത്തരം സമരരീതികൾ അവലംബിക്കേണ്ടി വരുന്നത്. ജീവിക്കാൻ ഒരുഗതിയുമില്ലാതായ മനുഷ്യരുടെ അവസാനത്തെ ചെറുത്തുനിൽപ്പാണ് ഈ സമരം. ഈ തീ അണയില്ല. ആളിപ്പടരുകതന്നെ ചെയ്യുമെന്നും തോമസ് ഐസക് പറഞ്ഞു.

Recommended Video

കുവൈറ്റില്‍ പ്രവാസികള്‍ക്കും കൊവിഡ് വാക്സിന്‍ സൗജന്യം,എത്തിക്കുക 3 കമ്പനിയുടെ വാക്സിനുകൾ

ഈ തെരഞ്ഞെടുപ്പിൽ യുഡിഎഫിനെ ഏറ്റവും വിഷമിപ്പിക്കുന്ന ഘടകം ഇതാണ്;കുറിപ്പുമായി തോമസ് ഐസക്

കൊവിഡ് രോഗികൾക്കുള്ള സ്‌പെഷ്യൽ പോസ്റ്റൽ വോട്ട്: സര്‍ട്ടിഫൈഡ് ലിസ്റ്റിൽ ഉൾപ്പെട്ടവർക്ക് മാത്രം