വള്ളം മറിഞ്ഞ് മൂന്നു യുവാക്കള് മരിച്ചു!! അപകടം കൊല്ലത്ത്
മീന് പിടിക്കാന് കായലില് എത്തിയവരാണ് അപകടത്തില് പെട്ടത്
കൊല്ലം: കണ്ടച്ചിറ കായലില് വള്ളം മറിഞ്ഞ് മൂന്നു യുവാക്കള് മുങ്ങി മരിച്ചു. മങ്ങാട് സ്വദേശികളായ മോനിഷ്, ടോണി, സാവിയോ എന്നിവരാണ് മരിച്ചത്. ഞായറാഴ്ച പുലര്ച്ചെയാണ് അപകടം നടന്നത്.
കായലില് മീന് പിടിക്കാന് പോയപ്പോഴാണ് ഇവര് സഞ്ചരിച്ച വള്ളം മറിഞ്ഞത്. രാത്രിയിലും പുലര്ച്ചെയും ശക്തമായ മഴയും കാറ്റുമുണ്ടായിരുന്നു. ഇതാണ് അപകടകാരണമെന്നാണ് നാട്ടുകാര് പറയുന്നത്. എന്നാല് പോലീസ് ഇതേക്കുറിച്ച് കൃത്യമായ വിശദീകരണം നല്കിയിട്ടില്ല.
അപകടം നടന്നയുടന് തന്നെ കരയിലും മറ്റുമുണ്ടായിരുന്ന ആളുകളെത്തി രക്ഷാപ്രവര്ത്തനം നടത്തി. എന്നാല് കരയ്ക്കെത്തിക്കുന്നതിനു മുമ്പ് തന്നെ മൂന്നു പേരും മരിച്ചിരുന്നു. യുവാക്കള് ഞായറാഴ്ച ഈ കായലില് മീന് പിടിക്കാന് വരാറുണ്ടെന്ന് നാട്ടുകാര് പറയുന്നു. ഇത്തരത്തില് എത്തിയ യുവാക്കളാണ് ഇപ്പോള് അപകടത്തില് പെട്ടിരിക്കുന്നത്. മങ്ങാട് അഷട്മുടി കായലിനോട് ചേര്ന്നാണ് കണ്ടച്ചിറ കായല് സ്ഥിതി ചെയ്യുന്നത്.