മൂര്ത്തി മാഷ് വിടവാങ്ങി... ദേശാഭിമാനി മുന് പത്രാധിപരും സിപിഎം സംസ്ഥാന സെക്രട്ടേറിയറ്റ് അംഗവും
കോഴിക്കോട്: ദേശാഭിമാനി മുന് പത്രാധിപരും സിപിഎം സംസ്ഥാന സെക്രട്ടേറിയറ്റ് അംഗവും ആയ വിവി ദക്ഷിണാമൂര്ത്തി അന്തരിച്ചു. 82 വയസ്സായിരുന്നു. കോഴിക്കോട്ടെ സ്വകാര്യ ആശുപത്രിയില് വച്ചായിരുന്നു മരണം.
ശ്വാസകോശാര്ബുദ ബാധിതനായിരുന്നു. ഓഗസ്റ്റ് 31 ബുധനാഴ്ച വൈകീട്ട് മൂന്നരയോടെയായിരുന്നു മരണം. മികച്ച പാര്ലമെന്റേറിയനും പ്രഭാഷകനും ആയിരുന്നു. കോഴിക്കോട്ടെ പിവിഎസ്, മിംസ് തുടങ്ങിയ ആശുപത്രികളില് ചികിത്സയിലായിരുന്നു അദ്ദേഹം. അതിനിടെ പേരാന്പ്രയിലെ വീട്ടിലേക്ക് മാറ്റിയിരുന്നു. കഴിഞ്ഞ ദിവസം ആരോഗ്യനില വഷളായതിനെ തുടര്ന്ന് സഹകരണ ആശുപത്രിയില് പ്രവേശിപ്പിക്കുകയായിരുന്നു.
മൂന്ന് തവണ എംഎല്എ ആയിട്ടുണ്ട്. 1965 ലും 67 ലും 80 ലും പേരാമ്പ്രയില് നിന്നാണ് അദ്ദേഹം നിയമസഭയില് എത്തിയത്. പാര്ട്ടി നിയമസഭ വിപ്പ് ആയും പ്രവര്ത്തിച്ചുണ്ട്.
അടുത്തിടെയാണ് അദ്ദേഹം ദേശാഭിമാനി പത്രാധിപസ്ഥാനം ഒഴിഞ്ഞത്. നേരത്തെ വിഎസ് അച്യുതാനന്ദനെ മാറ്റിയായിരുന്നു ദക്ഷിണാമൂര്ത്തിയെ ദേശാഭിമാനി പത്രാധിപരാക്കിയത്. ഇത് പാര്ട്ടിക്കുള്ളിലും പുറത്തും വലിയ ചര്ച്ചകള്ക്ക് വഴിവച്ചിരുന്നു.