ഓള്ഡ് ഫാഷന്ഡ് ധോണി
ക്യാപ്റ്റന്സി പോയതും ഫോമൗട്ടായതുമെല്ലാം മറന്ന് ധോണി പഴയ ശൈലിയുടെ ലാഞ്ചനകള് കാട്ടിയ മത്സരമായിരുന്നു ആര് സി ബിക്കെതിരെ ബാംഗ്ലൂരില് നടന്നത്. റൈസിങ് പുനെ സൂപ്പര്ജയന്റ്സ് മാനേജ്മെന്റ് ധോണിയെ ക്യാപ്റ്റന്സിയില് നിന്നും മാറ്റിയതും ടീം ഉടമയുടെ സഹോദരന് ധോണിയെ കളിയാക്കിയതമൊക്കെ ഫാന്സിനും ഇഷ്ടപ്പെട്ടിരുന്നില്ല.
ആകാശം മുട്ടെ ഒരു സിക്സര്
ലെഗ് സ്പിന്നര് യുവേന്ദ്ര ചാഹലിന്റെ പന്ത് ധോണി ഉയര്ത്തിയടിച്ചത് ചിന്നസ്വാമി സ്റ്റേഡിയത്തിന്റെ മേല്ക്കൂരയിലാണ് വിശ്രമിച്ചത്. 25 പന്തില് 3 ഫോറും ഒരു കൂറ്റന് സിക്സും അടക്കം 28 റണ്സ് മാത്രമേ എടുത്തുള്ളൂ എങ്കിലും ആരാധകരെ ധോണിയുടെ പ്രതാപകാലം ഓര്മിപ്പിക്കുന്നതായിരുന്നു ഈ പടുകൂറ്റന് സിക്സ്.
മിന്നല് സ്റ്റംപിങ്
അതും സാക്ഷാല് എ ബി ഡിവില്ലിയേഴ്സിനെ. സാമുവല് ബദ്രിയുടെ പന്തില് ഡിവില്ലിയേഴ്സിന്റെ കാല് ചെറുതായി ക്രീസിന് വെളിയില് നീങ്ങിയതേ ഉള്ളൂ. കണ്ണ് ചിമ്മിത്തുറക്കുന്ന വേഗത്തില് ധോണിയുടെ ഗ്ലൗ വര്ക്ക് കഴിഞ്ഞു. കാര്യമായ അപ്പീല് പോലുമില്ല ധോണിക്ക് വളരെ ഉറപ്പായിരുന്നു. സംഭവിച്ചതെന്താണെന്ന് എബിഡി തിരിച്ചറിയുമ്പോഴേക്കും ജയന്റ് സ്ക്രീനില് ചുവപ്പ് കത്തിയിരുന്നു.
എല്ലാം ഹോം ഗ്രൗണ്ടല്ലേ
ധോണിയുടെ സ്വാധീനത്തെപ്പറ്റി ആര്ക്കെങ്കിലും സംശയമുണ്ടെങ്കില് ഇംഗ്ലീഷ് ഓള്റൗണ്ടര് ബെന് സ്റ്റോക്സിന്റെ ഈ വാക്കുകള് കേട്ട് നോക്കൂ - ധോണി ടീമില് ഉണ്ടെങ്കില് ഏത് ഗ്രൗണ്ടും നമുക്ക് ഹോം ഗ്രൗണ്ടല്ലേ. മൂന്ന് വിക്കറ്റുമായി കളിയിലെ മാന് ഓഫ് ദ മാച്ചായിരുന്നു സ്റ്റോക്സ്.