കഷ്ടിച്ച് ഒരു ജയം
56 റണ്സിന്റെ വിജയം എന്ന് സ്കോര് കാര്ഡില് കാണുമെങ്കിലും അതിലും എത്രയോ ടൈറ്റായിരുന്നു കളി. ഡാരന് ബ്രാവോയും ജേസണ് ഹോള്ഡറും ക്രീസില് നില്ക്കേ 100 ല് താഴെ മാത്രം റണ്സ് മതിയായിരുന്നു വെസ്റ്റ് ഇന്ഡീസിന്. നാല് വിക്കറ്റുകള് കയ്യിലുണ്ടായിരുന്നു.
ബ്രാവോ വീണു, ബാക്കിയെല്ലാം ചടങ്ങ്
സ്കോര് 263 ല് നില്ക്കേ ബ്രാവോയെ സ്വന്തം പന്തില് പിടികൂടി യാസിര് ഷാ വിന്ഡീസിന്റെ കഥ കഴിച്ചു. പിന്നീടുള്ള വിക്കറ്റുകള് കണ്ണ് ചിമ്മിതുറക്കുമ്പോഴേക്കും വെസ്റ്റ് ഇന്ഡീസിന് നഷ്ടമായി. 289 റണ്സെടുത്ത് വിന്ഡീസ് ഓളൗട്ടാകുമ്പോള് വിജയലക്ഷ്യം 56 റണ്സ് അകലെ. 40 റണ്സുമായി ക്യാപ്റ്റന് ഹോള്ഡര് നോട്ടൗട്ട്.
ബ്രാവോ ഇത് കലക്കന് കളി
346 റണ്സിന്റെ വിജയലക്ഷ്യം തേടിയിറങ്ങിയ വിന്ഡീസിന് വേണ്ടി ഡാരന് ബ്രാവോ അടിച്ചത് 116 റണ്സ്. 249 പന്തില് 10 ഫോറും 1 സിക്സും. കരിയറില് ബ്രാവോയുടെ എട്ടാമത്തെ സെഞ്ചുറിയാണിത്. വിദേശത്ത് ഏഴാമത്തെയും.
പാകിസ്താന് രക്ഷപ്പെട്ടു
ഒന്നാം ഇന്നിംഗ്സില് വെറും 3 വിക്കറ്റിന് 579 റണ്സെടുത്ത പാകിസ്താന് രണ്ടാം ഇന്നിംഗ്സില് വെറും 123 റണ്സിന് ഓളൗട്ടായി. എന്നാല് വിന്ഡീസിനെ ആദ്യ ഇന്നിംഗ്സില് 357നും രണ്ടാം ഇന്നിംഗ്സില് 289 റണ്സിനും പുറത്താക്കാന് അവര്ക്ക് സാധിച്ചു.
ബിഷുവാണ് ബൗളര്
രണ്ട് ഇന്നിംഗ്സിലും ഡാരന് ബ്രാവോയാണ് വിന്ഡീസിന്റെ ടോപ് സ്കോററായത്. രണ്ടിന്നിംഗ്സിലും കൂടി 10 വിക്കറ്റെടുത്ത ലെഗ് സ്പിന്നര് ദേവേന്ദ്ര ബിഷുമാണ് ബൗളര്മാരിലെ താരം. പാകിസ്താന് വേണ്ടി യാസര് ഷാ ഏഴും ആമിര് മൂന്നും വിക്കറ്റെടുത്തു.