പാകിസ്താന്റെ ടെസ്റ്റ് ക്യാപ്റ്റന് മിസ്ബാഹുല് ഹഖാണ് തുടര്ച്ചയായി ആറു സിക്സറുകളുമായി മറ്റൊരു അവിശ്വസനീയ പ്രകടനം നടത്തിയത്. ഹോങ്കോങ് ട്വന്റി 20 ലീഗിലായിരുന്നു 42കാരന്റെ മിന്നല് ബാറ്റിങ്. 37 പന്തില് മിസ്ബാഹ് 82 റണ്സാണ് അടിച്ചുകൂട്ടിയത്. ഏഴു സിക്സറും നാലു ബൗണ്ടറികളും ഇതില് ഉള്പ്പെട്ടിരുന്നു.
യുവരാജ് ഒരോവറില് തന്നെയാണ് ആറു സിക്സറും പായിച്ചതെങ്കില് മിസ്ബാഹ് ആറു സിക്സറും നേടിയത് ഒരോവറിലല്ല. 19ാം ഓവറിലെ അവസാന രണ്ടു പന്തുകളിലും 20ാം ഓവറിലെ ആദ്യ നാലു പന്തുകളിലുമാണ് മിസ്ബാഹ് നിലം തൊടീക്കാതെ പറപ്പിച്ചത്.
അന്താരാഷ്ട്ര ക്രിക്കറ്റില് നിന്നു വിരമിക്കാന് തന്നോട് ആവശ്യപ്പെട്ട പാകിസ്താന് ക്രിക്കറ്റ് ബോര്ഡിനുള്ള മറുപടി കൂടിയാണ് താരത്തിന്റെ ഇന്നിങ്സ്. വരാനിരിക്കുന്ന പാക് ടീമിന്റെ വെസ്റ്റ് ഇന്ഡീസ് പര്യടനത്തിനു ശേഷം വിരമിക്കണമെന്ന് മിസ്ബാഹിനോട് പിസിബി ആവശ്യപ്പെട്ടിരുന്നു.