തന്റെ ട്വിറ്റര് അക്കൗണ്ടിലൂടെ കോലി ടീമിനെ പുകഴ്ത്തി. ഇത് വളരെ പ്രത്യേകതയുള്ള ദിവസമാണ്. ഞങ്ങളൊരു ടീമാണ്. ഒരുമിച്ച് ജയിക്കും ഒരുമിച്ചു തോല്ക്കും. നിങ്ങളെക്കുറിച്ച് അഭിമാനമുണ്ട് കൂട്ടുകാരേ, ജയ് ഹിന്ദ് എന്ന് കോലി ട്വീറ്റ് ചെയ്തു.
കോലിക്കു കീഴില് ഇന്ത്യയുടെ 16ാം ടെസ്റ്റ് വിജയമായിരുന്നു ഇത്. കരിയറിലെ ഏറ്റവും മികച്ച ജയമാണ് ബംഗളൂരുവിലേതെന്നു കോലി പറഞ്ഞു. ടീമിനെ സംബന്ധിച്ചിടത്തോളം വളരെ വൈകാരികമായ വിജയമായിരുന്നു ഇതെന്നും അദ്ദേഹം കൂട്ടിച്ചേര്ത്തു.
കൈവിട്ടുപോവുമായിരുന്ന രണ്ടാം ക്രിക്കറ്റ് ടെസ്റ്റില് 75 റണ്സിന്റെ ആധികാരിക വിജയമാണ് ഇന്ത്യ നേടിയത്. ഇതോടെ നാലു ടെസ്റ്റുകളുടെ പരമ്പരയില് ഇന്ത്യ 1-1നു ഒപ്പമെത്തുകയും ചെയ്തിരുന്നു. ആദ്യ ഇന്നിങ്സില് 87 റണ്സിന്റെ ലീഡ് വഴങ്ങിയ ശേഷമാണ് ഇന്ത്യ മല്സരത്തിലേക്ക് തിരിച്ചുവന്നത്.