വയനാട്ടില് കാട്ടാന ശല്യം രൂക്ഷമാകുന്നു, ഗതികെട്ട് നാട്ടുകാര്, വനംവകുപ്പ് ഉദ്യോഗസ്ഥര്ക്ക് നേരെ...
ബത്തേരി: വയനാട്ടില് കാട്ടാന ശല്യം രൂക്ഷമാവുന്നു. ഗതിയില്ലാതെ നാട്ടുകാര് വനംവകുപ്പ് ഉദ്യോഗസ്ഥരെ തടഞ്ഞിരിക്കുകയാണ്. ആന വ്യാപകമായി കൃഷി നശിപ്പിച്ചതില് നാട്ടുകാര് കടുത്ത പ്രതിഷേധത്തിലാണ്. ചീരാല് വില്ലേജിലെ മുണ്ടക്കൊല്ലിയിലാണ് ഇത്തവണ ആന കൃഷി നശിപ്പിച്ചത്. കൃഷിയിടങ്ങളെല്ലാം കാട്ടാനയുടെ വിളയാട്ടത്തില് നശിച്ചതോടെ വന് നഷ്ടമാണ് ഇവര് നേരിടുന്നത്. മുത്തങ്ങ റേഞ്ച് ഓഫീസര്, തോട്ടാമൂല ഡെപ്യൂട്ടി റേഞ്ച് ഓഫീസര് എന്നിവരെയാണ് മുണ്ടക്കൊല്ലിയില് വെച്ച് നാട്ടുകാര് തടഞ്ഞ് വെച്ചത്.
Recommended Video
വനംവകുപ്പ് ഈ മേഖലയില് വെച്ച രണ്ട് ഗേറ്റുകള് കാട്ടാനകള് തകര്ത്തിരുന്നു. ഇവിടെ നിന്നാണ് ചീരാല് വില്ലേജിന്റെ വിവിധ പ്രദേശങ്ങളില് കാട്ടാന എത്തുന്നതും, കൃഷികള് നശിപ്പിക്കുന്നതും. നേരത്തെ വന്യമൃഗ ശല്യം കടുത്തതോടെ സിപിഎം, കോണ്ഗ്രസ്, കാര്ഷിക പുരോഗമന സമിതി എന്നിവരുടെ നേതൃത്വത്തില് പഴൂര് ഫോറസ്റ്റ് ഓഫീസിലേക്ക് മാര്ച്ച നടത്തിയിരുന്നു. പ്രശ്നങ്ങള്ക്ക് അടിയന്തര പരിഹാരം കാണാമെന്ന് വനംവകുപ്പ് ഉറപ്പ് നല്കിയിരുന്നു.
അതേസമയം വനംവകുപ്പ് നല്കിയ ഉറപ്പുകളൊന്നും ഇതുവരെ പാലിക്കപ്പെട്ടിട്ടില്ല. ഇതാണ് പ്രതിഷേധം ശക്തമാകാന് കാരണം. നേരത്തെ വനംവകുപ്പ് കുങ്കിയാനകളെ നൂല്പ്പുഴയില് എത്തിച്ചിരുന്നു. എന്നാല് ആനശല്യം രൂക്ഷമായ മുണ്ടക്കൊല്ലിയില് ഇവയെ എത്തിച്ചിരുന്നില്ല. ഇതാണ് മറ്റൊരു പ്രതിഷേധ കാരണം. ഉപരോധ സമരത്തെ തുടര്ന്ന് നടന്ന ചര്ച്ചയില് ഈ പ്രദേശങ്ങളില് അടിയന്തരമായി അടിക്കാട് വെട്ടി പൊട്ടിയ കമ്പികള് വലിച്ച് കെട്ടാനും കാവല്ക്കാരെ ഏര്പ്പെടുത്താനും തീരുമാനിച്ചിട്ടുണ്ട്.
കാട്ടാനയുടെ ശല്യം രൂക്ഷമായ പ്രദേശങ്ങളില് കുങ്കിയാനകളെ എത്തിക്കും. ജാഗ്രത സമിതി കൂടി ശാശ്വത പരിഹാരത്തിന് സര്ക്കാരില് സമ്മര്ദം ചെലുത്താനും തീരുമാനിച്ചു. അതേസമയം കൃഷിയിടങ്ങളിലേക്ക് ആന സ്ഥിരമായി ഇറങ്ങുന്ന കടവുകളില് രാത്രികാലങ്ങളില് സ്ഥിരമായി വാച്ചര്മാരെ നിര്ത്താനും തീരുമാനിച്ചിട്ടുണ്ട്. കാട്ടാനയുടെ ആക്രമണത്തില് പരിക്കേറ്റ നിഖിലിന്റെ ചികിത്സാ ചെലവ് വനംവകുപ്പ് നല്കാനും തീരുമാനിച്ചിട്ടുണ്ട്.