യുഎഇയില് എല്പിജി സിലിണ്ടറിന് 20 ദിര്ഹം വെട്ടിക്കുറച്ചു
ദുബായ്: ആഗോള മാര്ക്കറ്റില് ക്രൂഡ് ഓയില് വില കുത്തനെ കുറഞ്ഞതിനെ തുടര്ന്ന് എമിറേറ്റ്സില് പാചകവാതകത്തിന്റെ വില കുത്തനെ കുറച്ചു. ഒരു സിലിണ്ടറിന് ഇരുപത് ദിര്ഹത്തോളമാണ് വില കുറച്ചിരിക്കുന്നത്. ജനവരി പതിനേഴുമുതല് വിലയിലെ മാറ്റം നിലവില്വരുമെന്ന് എമിറേറ്റ്സ് പെട്രോളിയം കോര്പ്പറേഷന് അറിയിച്ചു.
11 കിലോയുടെ സിലിണ്ടറിന് 75ല് നിന്നും 70 ദിര്ഹമായി കുറച്ചു. 22 കിലോ സിലിണ്ടറിന് 120ല് നിന്നും 110 ആയി കുറച്ചു. 44 കിലോ സിലിണ്ടറിന് ഇനിമുതല് 230 ദിര്ഹമായിരിക്കും വില. നേരത്തെ ഇത് 250 ദിര്ഹമായിരുന്നു.
ഇന്റര്നാഷണല് മാര്ക്കറ്റിലെ ക്രൂഡ് ഓയില് വില കുത്തനെ കുറഞ്ഞതിനാലാണ് എല്പിജി സിലിണ്ടറിന് വില കുറയ്ക്കാന് തീരുമാനിച്ചതെന്ന് എമിറേറ്റ്സ് പെട്രോളിയം കോര്പ്പറേഷന് സീനിയര് മാനേജന് ഹുസൈന് കാസിം അറിയിച്ചു. വരും നാളുകളിലും അന്താരാഷ്ട്ര മാര്ക്കറ്റിലെ ക്രൂഡ് ഓയിലിന്റെ വിലയനുസരിച്ച് എല്പിജിയുടെ വില ക്രമീകരിക്കാനാണ് തീരുമാനമെന്ന് അദ്ദേഹം അറിയിച്ചു.
കഴിഞ്ഞദിവസം ക്രൂഡ് ഓയിലിന്റെ വില ബാരലിന് 45 ഡോളറില് താഴെയായിരുന്നു. ആറുവര്ഷത്തെ താഴ്ന്ന നിലയില് ക്രൂഡ് ഓയില് വില എത്തിയിട്ടും ഇന്ത്യയില് സാധാരണക്കാര്ക്ക് അതിന്റെ ഗുണം അനുഭവിക്കാന് കഴിഞ്ഞിട്ടില്ല. മിക്ക ലോക രാജ്യങ്ങളിലും പെട്രോള്, ഡീസല്, എല്പിജി വില കുത്തനെ കുറച്ചിട്ടുണ്ട്. ഇന്ത്യയിലാകട്ടെ നാമമാത്രമായാണ് വില കുറയ്ക്കുന്നത്.