യുഎഇ: നബിദിനം, ഡിസംബര് 11ന് പൊതു അവധി, വിപണി പ്രവര്ത്തിക്കില്ല
ഡിസംബര് 11 ഞായറാഴ്ചയായിരിക്കും പൊതു അവധി
ദുബായ്: നബിദിനത്തോടനുബന്ധിച്ച് യുഎഇയില് ഡിസംബര് 11ന് പൊതു അവധി. സ്വകാര്യ മേഖലയക്കും ഡിസംബര് 11 ഞായറാഴ്ചയായിരിക്കും പൊതു അവധി. യുഎഇ മാനവ വിഭവശേഷി സ്വദേശിവല്ക്കരണ മന്ത്രി സാഖര് ഗോബാഷാണ് പൊതു അവധി പ്രഖ്യാപിച്ചത്.
ഷെയ്ഖ് ഖലീഫ ബിന് അല് നഹ്യാന്, ഷെയ്ഖ് മുഹമ്മദ് ബിന് റാഷിദ് അല് മക്തൂം, വൈസ് പ്രസിഡന്റ്, പ്രധാനമന്ത്രി, സുപ്രീം കൗണ്സില്, ഏഴ് എമിറ്റുകളുടെ ഭരണാധികാരികള് എന്നിവര്ക്ക് മന്ത്രി സാഖര് ഗോബാഷ് നബിദിനാശംസകള് നേര്ന്നു. എല്ലാ യുഎഇ നിവാസികള്ക്കും നബിദിനാശംസകള് നേര്ന്ന മന്ത്രി എല്ലാ അറബ് ഇസ്ലാമിക് രാജ്യങ്ങള്ക്കും സന്തോഷവും സമ്പല്സമൃദ്ധിയും ഉണ്ടാവാന് പ്രാര്ത്ഥിയ്ക്കണമെന്നും ആവശ്യപ്പെട്ടു.
പൊതു അവധിയായ ഡിസംബര് 11ന് യുഎഇയിലെ വിപണികളും അടഞ്ഞുകിടക്കും. ഡിസംബര് 12ന് തന്നെ വിപണി തുറന്നുപ്രവര്ത്തിക്കുമെന്ന് സെക്യൂരിറ്റീസ് ആന്ഡ് കമ്മോഡിറ്റീസ് അതോറിറ്റി വ്യക്തമാക്കി. യുഎഇ മാനവ വിഭവശേഷി മന്ത്രാലയത്തിന്റെ പ്രഖ്യാപന പ്രകാരമാണ് പൊതുഅവധി.