ഭാര്യയ്ക്ക് ഉറക്കഗുളിക നല്‍കി യുവാവ് മകളെ പീഡിപ്പിച്ചത് 6 വര്‍ഷം!

ചണ്ഡിഗഡ്: ഭാര്യയ്ക്ക് ഉറക്കഗുളിക നല്‍കി മയക്കിക്കിടത്തിയ ശേഷം യുവാവ് മകളെ ആറ് വര്‍ഷത്തോളം ലൈംഗികമായി പീഡിപ്പിച്ചു. ഹരിയാനയിലെ ബല്ലബ്ഗഡ് ജില്ലയിലാണ് സംഭവം. 12 വയസ്സുകാരിയായ പെണ്‍കുട്ടിയാണ് അച്ഛന്‍ ആറ് വര്‍ഷമായി തന്നെ ലൈംഗികമായി പീഡിപ്പിക്കുകയാണ് എന്ന പരാതിയുമായി രംഗത്തെത്തിയത്. കുട്ടിക്ക് ആറ് വയസ്സുള്ളപ്പോള്‍ തുടങ്ങിയതാണത്രെ അച്ഛന്റെ ഉപദ്രവം.

അമ്മയ്ക്ക് ഉറക്കഗുളിക നല്‍കി മയക്കിക്കിടത്തിയ ശേഷം അച്ഛന്‍ തന്നെ അടുത്ത മുറിയില്‍ കൊണ്ടുപോയി പീഡിപ്പിക്കുകയായിരുന്നു എന്ന് പെണ്‍കുട്ടി പറഞ്ഞു. ഇക്കഴിഞ്ഞ ബുധനാഴ്ചയും ഇയാള്‍ മകളെ പീഡിപ്പിച്ചിരുന്നത്രെ. മുത്തശ്ശിയോടും അമ്മായിയോടുമാണ് പെണ്‍കുട്ടി വിവരം പറഞ്ഞത്. ഇവര്‍ പെണ്‍കുട്ടിയുടെ അമ്മയെ കാര്യങ്ങള്‍ അറിയിച്ചു.

എന്നാല്‍ എല്ലാം അറിഞ്ഞ ശേഷവും അമ്മ ഭര്‍ത്താവിനെ എതിര്‍ക്കാനോ പ്രതികരിക്കാനോ തയ്യാറായില്ല. ഒടുവില്‍ സ്‌കൂളിലെ ടീച്ചറുടെ സഹായത്തോടെ പോലീസ് സ്‌റ്റേഷനില്‍ വിവരം അറിയിച്ചത്. പെണ്‍കുട്ടിയുടെ അമ്മയെ സ്‌കൂളില്‍ വിളിച്ചുവരുത്തി അധ്യാപികമാര്‍ സംസാരിക്കുകയും ചെയ്തു. പെണ്‍കുട്ടിയുടെ അധ്യാപികയാണ് അമ്മയെയും കൂട്ടി കുട്ടിയെ പോലീസ് സ്‌റ്റേഷനില്‍ എത്തിച്ച് പരാതി കൊടുപ്പിച്ചത്.

ചന്ദാവാലി സ്വദേശിനിയായ പെണ്‍കുട്ടി നാലാം ക്ലാസില്‍ പഠിക്കുകയാണ്. സദര്‍ പോലീസ് പെണ്‍കുട്ടിയുടെ അച്ഛനെതിരെ കേസെടുത്തു. പ്രാഥമിക അന്വേഷണവും ആരംഭിച്ചു. വിവരം അറിഞ്ഞ, പെണ്‍കുട്ടിയുടെ അച്ഛന്‍ ഒളിവിലാണ്. ഇയാള്‍ക്ക് വേണ്ടി പോലീസ് തിരച്ചില്‍ ആരംഭിച്ചതായി എസ് ഐ സന്തോഷ് അറിയിച്ചു.

English summary

Using sedative to put wife to sleep, man continues molesting minor daughter for 6 years in Haryana.