വിമാന യാത്രക്കൂലി വര്‍ധനവ് തിരിച്ചടിയാകും

മലപ്പുറം: എയര്‍ ഇന്ത്യ ജനവരി മുതല്‍ നടപ്പാക്കുന്ന ചാര്‍ജ്ജ് വര്‍ധനവ് ഗള്‍ഫില്‍ ജോലി ചെയ്യുന്നവര്‍ക്ക് കനത്ത തിരിച്ചടിയാകുമെന്ന് ഗള്‍ഫ് പാസഞ്ചേഴ്സ് അസോസിയേഷന്‍ സെക്രട്ടറി ഹംസ ഹാജി കിസ്മത് പറഞ്ഞു.

ഗള്‍ഫില്‍ പുതിയ തൊഴില്‍ നിയമങ്ങള്‍ നടപ്പാക്കിയതും സ്വദേശിവാദം ശക്തമായതും കാരണം പ്രതിസന്ധി നേരിടുന്ന അവിടുത്തെ മലയാളികളെ കൂടുതല്‍ ദുരിതത്തിലാഴ്ത്തുന്നതാണ് വിമാന യാത്രാക്കൂലി വര്‍ധനവെന്ന് അദ്ദേഹം പ്രസ്താവനയില്‍ പറഞ്ഞു.

ഒരു ബാരല്‍ എണ്ണയുടെ വില 38 ഡോളറില്‍ നിന്ന് 22 ഡോളറായി കുറഞ്ഞിരിക്കുന്ന സാഹചര്യത്തില്‍ എയര്‍ ഇന്ത്യ ചാര്‍ജ്ജ് വര്‍ധിപ്പിച്ചത് നീതീകരിക്കാനാവില്ലെന്ന് ഹംസ ഹാജി ചൂണ്ടിക്കാട്ടി.

വിമാന യാത്രാക്കൂലി വര്‍ധനയില്‍ എയര്‍ ഇന്ത്യ ഉറച്ചു നില്ക്കുകയാണെങ്കില്‍ ഗള്‍ഫ് മേഖലയിലെ ഇന്ത്യക്കാര്‍ എയര്‍ ഇന്ത്യയെ ബഹിഷ്കരിക്കാന്‍ തീരുമാനിക്കുമെന്ന് അദ്ദേഹം മുന്നറിയിപ്പു നല്കി.