ബഹ്റിനില്‍ ദില്ലി പബ്ലിക് സ്കൂള്‍ തുടങ്ങും

ദില്ലി: ബഹ്റിനില്‍ ദില്ലി പബ്ലിക് സ്കൂള്‍ സപ്തംബറോടെ തുടങ്ങും. ബഹറിനിലെ ഇന്ത്യന്‍ വ്യാപാരി ഭഗ്വാന്‍ അസര്‍പോതയാണ് സ്കൂള്‍ ആരംഭിക്കുന്നത്.

ബഹറിനില്‍ കൂടുതല്‍ മെച്ചപ്പെട്ട സൗകര്യങ്ങളുള്ള ഇന്ത്യന്‍ സ്കൂള്‍ സ്ഥാപിക്കുക എന്ന ലക്ഷ്യമാണ് തനിക്കുള്ളതെന്ന് ഭഗ്വാന്‍ പറഞ്ഞു. നാലോ അഞ്ചോ ഇന്ത്യന്‍ സ്കൂളുകള്‍ ഇപ്പോള്‍ ബഹ്റിനിലുണ്ട്. എന്നാല്‍ ഇവയില്‍ മറ്റ ്വിദേശ സ്കൂളുകളെ അപേക്ഷിച്ച് ഫീസ് വളരെ കുറവാണ്.

കൂടുതല്‍ ഫീസ് കൊടുത്ത് കൂടുതല്‍ സൗകര്യങ്ങളുള്ള സ്കൂളില്‍ കുട്ടികളെ പഠിപ്പിക്കാന്‍ ബഹ്റിനിലെ പല ഇന്ത്യക്കാരും തയ്യാറാണ്. ഈ സാഹചര്യത്തിലാണ് ദില്ലി പബ്ലിക് സ്കൂള്‍ ബഹ്റിനില്‍ തുടങ്ങാമെന്ന ആലോചനയുണ്ടായതെന്ന് അദ്ദേഹം വ്യക്തമാക്കി.

ദില്ലി കേന്ദ്രീകരിച്ച് പ്രവര്‍ത്തിക്കുന്ന വിദ്യാഭ്യാസ സ്ഥാപനമായ ദില്ലി പബ്ലിക് സ്കൂളിന് ഇന്ത്യയില്‍ പല നഗരങ്ങളിലായി എട്ട് സ്കൂളുകള്‍ കൂടിയുണ്ട്. മികച്ച പാഠ്യസമ്പ്രദായത്തിന് പ്രശസ്തമാണ് ഈ സ്കൂള്‍.

രാജസ്ഥാനില്‍ മെഡിക്കല്‍, എഞ്ചിനീയറിംഗ്, കോമേഴ്സ്, ഇന്‍ഫര്‍മേഷന്‍ ടെക്നോളജി കോഴ്സുകളുള്ള ഒരു സര്‍വകലാശാല തുടങ്ങാനും പദ്ധതിയുണ്ടെന്ന് അദ്ദേഹം പറഞ്ഞു.