ദുബായില്‍ ദോശയും കോഴിക്കറിയും

ദുബായ്: കേരളത്തിന്റെ ദോശയും ലഖ്നൗവില്‍ നിന്നുള്ള ചിക്കന്‍ ബിരിയാണിയും ദുബായ് ഷോപ്പിംഗ് ഫെസ്റിവലില്‍ ഹരമാകുന്നു.

ദുബായ് ഷോപ്പിംഗ് ഫെസ്റിവലില്‍ ഒരുക്കിയിട്ടുള്ള ആഗോള ഗ്രാമത്തിലെ ഇന്ത്യന്‍ സ്റാളില്‍ നല്ല തിരക്കാണ്. തെക്കേ ഇന്ത്യന്‍ വിഭവങ്ങളായ ദോശയും ഇഡ്ഡലിയും ലഖ്നൗവിലെ പ്രസിദ്ധമായ ചിക്കന്‍ കബാബും ബിരിയാണിയും രുചിക്കാന്‍ ദിവസേന ആയിരങ്ങളാണ് ഇവിടെയെത്തുന്നത്. ഇന്ത്യന്‍ വിഭവങ്ങള്‍ ഒരുക്കിയിട്ടുള്ള 14 സ്റാളുകളില്‍ പഞ്ചാബിന്റെ തനത് വിഭവമായ സാഗ് റോട്ടി, ബംഗാളില്‍ നിന്നുള്ള മധുരപലഹാരങ്ങള്‍ എന്നിവയുമുണ്ട്.

ആഗ്രയില്‍ നിന്നും കൊണ്ടുവന്ന റിക്ഷകളില്‍ കയറി ഗ്രാമം ചുറ്റുന്നതിന് അഞ്ച് മുതല്‍ 10 ദിര്‍ഹം വരെ കൊടുത്താല്‍ മതിയാകും. ഇവിടെയുള്ള സ്റാളുകളില്‍ 75 ശതമാനവും ഇന്ത്യന്‍ സ്റാളുകളാണ്.

തിഹാര്‍ ജയിലിലെ വനിതാ തടവുകാരുടെ കരകൗശല ഉല്‍പ്പന്നങ്ങളും ഇവിടെ നിന്നും വാങ്ങാം. ചിത്രങ്ങളും പഴ്സുകളും ഹാന്‍ഡ്ബാഗുകളും തുടങ്ങി വൈവിധ്യമാര്‍ന്ന ഉല്‍പ്പന്നങ്ങളാണ് ഈ സ്റാളിലുള്ളത്. ഇന്ത്യയില്‍ നിന്നുള്ള തുണിത്തരങ്ങള്‍ വാങ്ങാനും നല്ല തിരക്കുണ്ട്.

ഗ്രാമത്തിനുള്ളില്‍ 53 അടി ഉയരത്തില്‍ തയാറാക്കിയിട്ടുള്ള കുത്തബ് മിനാറിന്റെ മാതൃക സന്ദര്‍ശകരെ ആകര്‍ഷിക്കുന്നതാണ്. ചാര്‍മിനാറിന്റെയും ബുലന്ദ് ദര്‍വാജയുടെയും രൂപത്തിലാണ് ഇന്ത്യന്‍ സ്റാളുകളിലേക്കുള്ള കവാടം രൂപകല്‍പ്പന ചെയ്തിരിക്കുന്നത്.