ദുബായ് ഇന്ത്യന്‍ സ്കൂളിന് 40-ാം പിറന്നാള്‍

ദുബായ്: ഇന്ത്യയ്ക്കു വെളിയിലുള്ള ഏറ്റവും വലിയ സ്കൂളുകളിലൊന്നായ ദുബായിലെ ഇന്ത്യന്‍ ഹൈസ്കൂള്‍ 40-ാം വാര്‍ഷികം ആഘോഷിച്ചു. വാര്‍ഷികസമ്മേളനത്തില്‍ സ്കൂളിലെ പ്രഗത്ഭരായ വിദ്യാര്‍ത്ഥികളേയും ദീര്‍ഘകാലം സേവനമനുഷ്ഠിച്ച അദ്ധ്യാപകരേയും ആദരിച്ചു.

ദുബായ് വിദ്യാഭ്യാസ മേഖലാവകുപ്പ് മേധാവി ഫാത്തിമ അബ്ദുല്‍ ഖലീഖ് വാര്‍ഷിക സമ്മേളനത്തില്‍ മുഖ്യാതിഥിയായിരുന്നു. പാഠ്യ- പാഠ്യേതര രംഗങ്ങളില്‍ അഭിമാനാര്‍ഹമായ ഇന്ത്യന്‍ ഹൈസ്കൂളിന്റെ പ്രവര്‍ത്തനങ്ങള്‍ അഭിമാനാര്‍ഹമായിരുന്നുവെന്ന് അവര്‍ ചൂണ്ടിക്കാട്ടി. ദുബായിലെ ഇന്ത്യന്‍ കോണ്‍സല്‍ ജനറല്‍ അശോക് മുഖര്‍ജി സമ്മേളനത്തില്‍ പങ്കെടുത്തു.

8500 ല്‍ പരം വിദ്യാര്‍ത്ഥികള്‍ പഠിക്കുന്ന ദുബായ് ഇന്ത്യന്‍ ഹൈസ്കൂള്‍ ഇന്ത്യയ്ക്കു പുറത്തെ ഏറ്റവും വലിയ ഇന്ത്യന്‍ സ്കൂളാണ്. റാം ബുക്സാനിയാണ് സ്കൂള്‍ ചെയര്‍മാന്‍.

40-ാം വാര്‍ഷികത്തോടനുബന്ധിച്ച് സ്കൂളും ദുബായിലെ ഇന്ത്യന്‍ സമൂഹവും ചേര്‍ന്ന് നിരവധി മികച്ച വിദ്യാഭ്യാസ പ്രവര്‍ത്തനങ്ങള്‍ക്ക് രൂപം നല്‍കിയിട്ടുണ്ട്. അടുത്ത കാലത്ത് പ്രധാനമന്ത്രിയുടെ ഗുജറാത്ത് ദുരിതാശ്വാസ നിധിയിലേയ്ക്ക് സ്കൂളിലെ കുട്ടികള്‍ പിരിവെടുത്തും രക്ഷിതാക്കളുടെ സംഭാവനയുമായി 60 ലക്ഷത്തോളം രൂപ സ്കൂളിന്റെ ആഭിമുഖ്യത്തില്‍ നല്‍കിയിരുന്നു.