പ്രവാസി സംഗമം ആഗസ്തില്: മന്ത്രി
തിരുവനന്തപുരം: ആഗസ്തില് പ്രവാസി മലയാളി സംഘടനകളുടെ സംഗമം സര്ക്കാര് സംഘടിപ്പിക്കുമെന്ന് പ്രവാസികാര്യ മന്ത്രി എം.എം. ഹസ്സന്. ഈ സംഗമത്തില് വിദേശമലയാളികളുടെ പ്രശ്നങ്ങള് ചര്ച്ച ചെയ്യും.
ഈ സംഗമത്തില് നിന്നും ഉരുത്തിരിയുന്ന അഭിപ്രായങ്ങളുടെയും നിര്ദേശങ്ങളുടെയും അടിസ്ഥാനത്തിലായിരിക്കും വിദേശമലയാളികള്ക്കുള്ള ക്ഷേമപദ്ധതികള് ഉള്പ്പെടെയുള്ള കാര്യങ്ങള് തയ്യാറാക്കുകയെന്ന് മന്ത്രി അറിയിച്ചു. ജൂണ് 19 ചൊവാഴ്ച തിരുവനന്തപുരം പ്രസ് ക്ലബ് സംഘടിപ്പിച്ച മീറ്റ് ദി പ്രസില് പങ്കെടുക്കുകയായിരുന്നു ഹസ്സന്.
വിദേശത്ത് വ്യവസായം നടത്തി വിജയം നേടിയ മലയാളികള് ഉള്പ്പെടെയുള്ളവരെ സംഗമത്തില് പങ്കെടുപ്പിക്കും. വിദേശമലയാളികളുടെ നിക്ഷേപം എങ്ങിനെ ഉപയോഗിക്കാമെന്നുള്ളതിനെക്കുറിച്ച് ഇവരുടെ നിര്ദ്ദേശങ്ങളും സ്വീകരിക്കും. വിദേശമലയാളികളുടെ സംഭാവനകളെക്കുറിച്ച് തിരുവനന്തപുരത്തെ സെന്റര് ഫോര് ഡവലപ്മെന്റ് സ്റഡീസ് നടത്തിയ പഠനവും സര്ക്കാര് കണക്കിലെടുക്കും. സെന്ററിലെ മൂന്നംഗ വിദഗ്ധസംഘം കൂടുതല് പഠനം നടത്താനായി അബുദാബിയിലേക്ക് പോയിട്ടുണ്ടെന്നും മന്ത്രി അറിയിച്ചു.
നോണ് റസിഡന്റ്സ് കേരളൈറ്റ്സ് അസോസിയേഷന്( നോര്ക്ക) പുന:സംഘടിപ്പിക്കും. ഇതിന്റെ കീഴിലുള്ള ക്ഷേമവകുപ്പ് കൂടുതല് കാര്യക്ഷമമാക്കുമെന്നും മന്ത്രി പറഞ്ഞു. കാര്യമായി പഠനം നടത്തിയ ശേഷമേ ഗള്ഫ് രാജ്യങ്ങള് സന്ദര്ശിക്കുകയുള്ളൂ. ആഗസ്തിലെ ചര്ച്ചകള്ക്ക് ശേഷം ഗള്ഫ് രാജ്യങ്ങള് സന്ദര്ശിക്കാനുള്ള പരിപാടിയുണ്ടെന്നും മന്ത്രി വ്യക്തമാക്കി.