ആലുക്കാസിന്റെ സമൂഹവിവാഹം

ദുബായ്: ആലുക്കാസ് ജ്വല്ലറി ഗള്‍ഫിലെ മലയാളികള്‍ക്കായി സമൂഹ വിവാഹമൊരുക്കുന്നു. 2002 നുവരി രണ്ടാം വാരത്തില്‍ കൊച്ചിയില്‍ വെച്ചാണ് മംഗല്യമേള.

തങ്ങളുടെ പെണ്‍കുട്ടികള്‍ക്ക് അനുയോജ്യരായ വരന്മാരെ കണ്ടെത്താന്‍ വിഷമത നേരിടുന്ന കേരളത്തിലെ പാവപ്പെട്ട മാതാപിതാക്കളെ സഹായിക്കാനായാണ് സമൂഹവിവാഹം ഒരുക്കുന്നതെന്ന് ആലുക്കാസ് മാനേജിംഗ് ഡയറക്ടര്‍ ജോയി ആലുക്കാസ് പറഞ്ഞു.

കേരളത്തിലെ വിവിധ ഭാഗങ്ങളിലുള്ള പെണ്‍കുട്ടികള്‍ക്കും മാതാപിതാക്കള്‍ക്കും സമൂഹവിവാഹ പരിപാടിയിലേക്ക് അപേക്ഷിക്കാം. ഇങ്ങനെ ലഭിക്കുന്ന അപേക്ഷകളില്‍ നിന്നും വധുക്കളുടെ ഒരു അന്തിമ ലിസ്റ് തയ്യാറാക്കും. സമൂഹവിവാഹത്തില്‍ താത്പര്യം പ്രകടിപ്പിച്ച് അപേക്ഷിക്കുന്ന ഗള്‍ഫിലെ പുരുഷന്മാര്‍ക്ക് ഈ ലിസ്റില്‍ നിന്ന് തങ്ങളുടെ ജോടികളെ കണ്ടെത്താം. തങ്ങള്‍ കണ്ടെത്തിയ പെണ്‍കുട്ടികളെ കാണാനും മാതാപിതാക്കളുമായി സംസാരിക്കാനുമുള്ള അവസരം ആലുക്കാസ് ഒരുക്കും.

ഇതുവരെ ഗള്‍ഫിലെ അമ്പതോളം ചെറുപ്പക്കാരില്‍ നിന്ന് അപേക്ഷ കിട്ടിയതായി ജോയി പറഞ്ഞു. മംഗല്യമേളയില്‍ താത്പര്യം പ്രകടിപ്പിച്ച് പെണ്‍കുട്ടികളുടെ കുടുംബങ്ങളില്‍ നിന്നും നൂറുകണക്കിന് അപേക്ഷകളും ലഭിച്ചിട്ടുണ്ട്.

10 പവന്‍ സ്വര്‍ണവും വിവാഹവസ്ത്രവും ഓരോ വധുവിനും വിവാഹസമ്മാനമായി ലഭിക്കും. ഓരോ വധുവിനും ഒരു ലക്ഷം രൂപയാണ് ചെലവ് കണക്കാക്കുന്നതെന്ന് ജോയി പറഞ്ഞു.

താത്പര്യമുള്ളവര്‍ക്ക് അപേക്ഷിക്കാനായി എല്ലാ ആലുക്കാസ് ഷോറൂമുകളിലും അപേക്ഷാ ഫോമുകള്‍ ലഭ്യമാണ്. ആലുക്കാസ്മംഗല്യം.കോം എന്ന സൈറ്റില്‍ നിന്നും ഫോം ഡൗണ്‍ലോഡ് ചെയ്യാനുള്ള സംവിധാനവുമുണ്ട്.