മടങ്ങി വന്ന പ്രവാസികളുടെ സമാഗമം

തിരുവനന്തപുരം : വിദേശത്തു നിന്ന് തിരിച്ചെത്തിയ മലയാളികളുടെ സംഗമം പ്രവാസി വകുപ്പ് സംഘടിപ്പിക്കുന്നു. സാമാഗമം എന്ന പേരില്‍ തിരുവനന്തപുരത്താണ് സമ്മേളനം സംഘടിപ്പിച്ചിരിക്കുന്നത്. പ്രവാസ ക്ഷേമ മന്ത്രി എം എം ഹസന്‍ വാര്‍ത്താസമ്മേളനത്തില്‍ അറിയിച്ചതാണ് ഈ വിവരം.

ഡിസമ്പര്‍ 18 ന് രാവിലെ 10മണിക്ക്് ടാഗോര്‍ തീയേറ്ററില്‍ മുഖ്യമന്ത്രി സമാഗമം ഉദ്ഘാടനം ചെയ്യും. സമാഗമത്തില്‍ പങ്കെടുക്കാനാഗ്രഹിക്കുന്ന സംഘടനകള്‍ നവമ്പര്‍ 30നു മുമ്പ് രജിസ്റര്‍ ചെയ്യണമെന്ന് ഹസന്‍ പറഞ്ഞു.

മറുനാടന്‍ മലയാളി സംഗമമായ സമന്വയം ബാഗ്ളൂരില്‍ സംഘടിപ്പിക്കും. ജനവരി 19, 20 തീയതികളില്‍ നടക്കുന്ന സമന്വയം കര്‍ണ്ണാടക മുഖ്യമന്ത്രി എസ് എം കൃഷ്ണ ഉദ്ഘാടനം ചെയ്യും. മറുനാടന്‍ മലയാളി സംഘടനകളുടെ രണ്ടുവീതം പ്രതിനിധികള്‍ക്ക് സമന്വയത്തില്‍ പങ്കെടുക്കാം. അടുത്ത സമവായം ഗള്‍ഫില്‍ സംഘടിപ്പിക്കുമെന്ന് ഹസന്‍ പറഞ്ഞു.

നോര്‍ക്കയുടെ പ്രത്യേക സെല്‍ ഡിസംബര്‍ 15നു മുമ്പ് ദില്ലിയില്‍ പ്രവര്‍ത്തനമാരംഭിക്കും. വിദേശത്ത് മരിക്കുന്ന മലയാളികളുടെ ജഡം നാട്ടിലെത്തിക്കാനുള്ള നടപടികള്‍ സെല്‍ ഏകോപിപ്പിക്കും. വിദേശരാജ്യങ്ങളില്‍ കാണാതാവുകയോ ജയിലാവുകയോ ചെയ്യുന്ന മലയാളികളടെ പ്രശ്നങ്ങളും സെല്‍ കൈകാര്യം ചെയ്യും .

പ്രവാസിവകുപ്പിന്റെ കീഴില്‍ പ്രവാസി ക്ഷേമ കോര്‍പ്പറേഷന്‍ രൂപീകരിക്കാന്‍ സര്‍ക്കാര്‍ ആലോചിക്കുകയാണെന്ന് ഹസന്‍ പറഞ്ഞു. നിലവിലുള്ള പ്രവാസി ക്ഷേമ ഏജന്‍സിക്കു പകരമാണ് ഇത്.