മലയാളിസംഗമം: കോരമംഗല ഒരുങ്ങി

ബാംഗ്ലൂര്‍: മറുനാടന്‍ മലയാളി സംഗമത്തിനായി ബാംഗ്ലൂരിലെ കോരമംഗല ഇന്‍ഡോര്‍സ്റേഡിയം ഒരുങ്ങി. ജനവരി 19,20 തീയതികളിലാണ് സമ്മേളനം നടക്കുക.

ഇന്ത്യയ്ക്കകത്തും പുറത്തുമുള്ള മലയാളികള്‍ സമ്മേളനത്തില്‍ പങ്കെടുക്കും. ബാംഗ്ലൂരിലെ സ്വാഗതസംഘം ഓഫീസില്‍ ഇതുവരെ 400ഓളം മറുനാടന്‍ മലയാളികള്‍ പേര്‍ രജിസ്റര്‍ ചെയ്തിട്ടുണ്ട്. 5000 പേരെങ്കിലും സമ്മേളനത്തിനെത്തുമെന്ന് സംഘാടകര്‍ പറഞ്ഞു.

പ്രതിനിധികള്‍ക്ക് താമസിക്കാന്‍ നഗരത്തിലെ ഹോട്ടലുകള്‍ ബുക്ക്ചെയ്തിട്ടുണ്ട്. ജനവരി 19 ശനിയാഴ്ച കേന്ദ്രറെയില്‍വേ മന്ത്രി ഒ. രാജഗോപാല്‍ സമ്മേളനം ഉദ്ഘാടനം ചെയ്യും. പ്രവാസിമലയാളികള്‍ക്കുള്ള നോര്‍ക്കവകുപ്പ് മന്ത്രി എം.എം. ഹസ്സന്‍ അധ്യക്ഷനായിരിക്കും.

കര്‍ണാടകമന്ത്രിമാരായ റോഷന്‍ ബാഗ്, ടി. ജോണ്‍ എന്നിവരും ബാംഗ്ലൂര്‍ മേയര്‍ കെ. ചന്ദ്രശേഖരന്‍, സി.എം. ഇബ്രാഹിം, കേരളത്തില്‍ നിന്നുള്ള ഉമ്മന്‍ചാണ്ടി എംഎല്‍എ, രമേശ് ചെന്നിത്തല എംപി എന്നിവരും കര്‍ണാടകയിലെ എംഎല്‍എയായ മുനിസ്വാമിയും സമ്മേളനത്തില്‍ പങ്കെടുക്കും.

സമ്മേളനത്തോടനുബന്ധിച്ചുള്ള എക്സിബിഷന്റെ ഉദ്ഘാടനവും ജനവരി 19ന് നടക്കും. എക്സിബിഷന്റെ ഉദ്ഘാടനം ജനവരി 19ന് രാവിലെ ഒമ്പതിന് എക്സിബിഷന്‍ കമ്മിറ്റി ചെയര്‍മാന്‍ എ.കെ. നായര്‍ നിര്‍വഹിക്കും. അക്കമഡേഷന്‍ കമ്മിറ്റി ചെയര്‍മാന്‍ ജോസ് മാണി അധ്യക്ഷനായിരിക്കും.

എക്സിബിഷനില്‍ കെഎസ്ഐഡിസി, കയര്‍ബോര്‍ഡ്,ടൊയോട്ട എന്നീ കമ്പനികളുടെ സ്റാളുകളുണ്ടായിരിക്കും.