യുഎസില്‍ ജിമ്മി ജോര്‍ജ്ജ് വോളി

ന്യൂ ജഴ്സി: വടക്കന്‍ അമേരിക്കയിലെ മലയാളികള്‍ ഇതാ 15ാം തവണയും ജിമ്മി ജോര്‍ജ്ജിന്റെ ഓര്‍മ്മ പുതുക്കുന്നു. വടക്കന്‍ അമേരിക്കയിലെ കേരളാ വോളിബോള്‍ ലീഗിന്റെ ജിമ്മി ജോര്‍ജ്ജ് സ്മാരക വോളിബോള്‍ ടൂര്‍ണ്ണമെന്റ് മാര്‍ച്ച് 25 തിങ്കളാഴ്ച ആരംഭിച്ചു.

ന്യൂജഴ്സിയില്‍ ഇത് രണ്ടാം തവണയാണ് ജിമ്മി ജോര്‍ജ്ജ് സ്മാരക ടൂര്‍ണ്ണമെന്റ് നടക്കുന്നത്. ന്യൂജഴ്സിയിലെ മലയാളി സംഘടനയായ കേരളാ കള്‍ച്ചറല്‍ ഫോറമാണ് ടൂര്‍ണ്ണമെന്റിന്റെ സംഘാടകര്‍. വടക്കന്‍ അമേരിക്കയിലെ മലയാളി സംഘടനയായ ഫൊക്കാനയും ടൂര്‍ണ്ണമെന്റില്‍ പ്രധാന പങ്കുവഹിക്കുന്നു. ഫൊക്കാന റീജിയണല്‍ പ്രസിഡന്റും കെ.സി.എഫ്. ബോര്‍ഡ് ട്രസ്റി ചെയര്‍മാനുമായ ടി.എസ്. ചാക്കോയുടെ നേതൃത്വത്തില്‍ ടൂര്‍ണ്ണമെന്റിന്റെ വിജയത്തിനായി പ്രവര്‍ത്തനം നടക്കുന്നു.

ഹാക്കെന്‍സാക്കിലുള്ള ഫെയര്‍ലെ ഡിക്കിന്‍സണ്‍ യൂണിവേഴ്സിറ്റി ക്യാമ്പസിലുള്ള റോത്മാന്‍ സെന്ററിലാണ് മത്സരങ്ങള്‍ നടക്കുന്നത്. ജിമ്മിയുടെ ജന്മനാടായ കേരളം പോലും ജിമ്മിയെ മറക്കുമ്പോള്‍ അദ്ദേഹത്തിന്റെ പേരില്‍ കടലുകള്‍ക്കക്കരെ നടക്കുന്ന ഈ ടൂര്‍ണ്ണമെന്റ് മലയാളത്തിന്റെ മാനം കാക്കുന്നു.