ദുബായില്‍ ഓക്സിജന്‍ പാര്‍ലര്‍ തുടങ്ങി

ദുബായ്: യു ഇ എയിലെ ആദ്യത്തെ ഓക്സിജന്‍ പാര്‍ലര്‍ ദുബായില്‍ തുടങ്ങി. ഒക്ടോബര്‍ 28നാണ് ഒ2 വേള്‍ഡ് എന്ന പേരില്‍ ഓക്സിജന്‍ പാര്‍ലര്‍ ദുബായില്‍ പ്രവര്‍ത്തനം ആരംഭിച്ചത്.

തുടര്‍ച്ചയായ മണിക്കൂറുകളിലെ കഠിനാധ്വാനം, ദീര്‍ഘയാത്ര, മലിനവായു ശ്വസിക്കുന്നതു മൂലമുണ്ടാവുന്ന അസ്വസ്ഥതകള്‍... നഗരത്തിലെ ഈ ദൈനം ദിന ജീവിതം മാനസികമായ പിരിമുറക്കവുമാണ് അതിക്ഷീണവുമാണ് നല്‍കുന്നത്. ഓക്സിജന്‍ പാര്‍ലര്‍ ഇതില്‍ നിന്നെല്ലാം സമാശ്വാസം കണ്ടെത്താന്‍ സഹായിക്കുന്നുവെന്നാണ് ഒ2 വേള്‍ഡ് അധികൃതര്‍ അവകാശപ്പെടുന്നത്.

95 ശതമാനം ഓക്സിജനുള്ള ശുദ്ധവായു 20 മിനുട്ടോളം ശ്വസിക്കാനുള്ള സംവിധാനമാണ് ഓക്സിജന്‍ പാര്‍ലറില്‍ ഒരുക്കിയിരിക്കുന്നത്. ശുദ്ധീകരിച്ച് 95 ശതമാനവും ഓക്സിജന്‍ മാത്രമാക്കി തീര്‍ത്ത വായുവാണ് ഓക്സിജന്‍ പാര്‍ലറില്‍ ശ്വസിക്കാനാവുക. 20 മിനുട്ടോളം ഓക്സിജന്‍ ശ്വസിക്കുന്നതിലൂടെ ശരീരത്തിന്റെ ആയാസം അയയുകയും മാനസികമായ ഉല്ലാസം ലഭിക്കുകയും ചെയ്യുന്നു. പിന്നീട് 15 മിനുട്ടോളം ഇലക്ട്രോണിക് മസാജ്. പല രോഗങ്ങള്‍ക്കും പ്രതിവിധിയായി ഈ ശീലം ഉപയോഗിക്കാവുന്നതാണെന്ന് ഓക്സിജന്‍ പാര്‍ലര്‍ അധികൃതര്‍ അവകാശപ്പെടുന്നത്.

ബര്‍ ദുബായിലെ ബാങ്ക് സ്ട്രീറ്റില്‍ ഹോട്ടല്‍ ഫോര്‍ പോയിന്റ്സ് ഷെറാട്ടോണിന് എതിര്‍വശത്ത ആത്രിയം സെന്ററിലാണ് ഒ2 വേള്‍ഡ്. 20 മിനുട്ട് നേരത്തെ ഓക്സിജന്‍ ശ്വസനവും 15 മിനുട്ട് നേരത്തെ ഇലക്ട്രോണിക് മസാജുമാണ് പാര്‍ലറില്‍ ഉപഭോക്താക്കള്‍ക്ക് ലഭിക്കുന്നത്. 75 ദഹ്റം ആണ് ഇതിനുള്ള ഫീസ്.