ജോലി പോയ മലയാളി ഗള്‍ഫില്‍ തൂങ്ങിമരിച്ചു

ഹൂറ: കമ്പനി ജോലിയില്‍ നിന്നും പിരിച്ചുവിട്ട മലയാളി ബഹ്റിനില്‍ താമസസ്ഥലത്ത് തൂങ്ങിമരിച്ച നിലയില്‍ കാണപ്പെട്ടു.

വടകര സ്വദേശിയായ ടി. കെ. പവിത്രനാണ് (42) സീലിംഗ് ഫാനില്‍ തൂങ്ങിമരിച്ചത്. ബഹ്റിനിലെ ഹൂറയിലെ അല്‍ മാനാര്‍ അപ്പാര്‍ട്മെന്റ്സില്‍ ഹൗസ് കീപ്പിംഗ് അസിസ്റന്റായി ജോലി ചെയ്യുകയായിരുന്നു പവിത്രന്‍. കഴിഞ്ഞ 17 വര്‍ഷമായി പവിത്രന്‍ ഇവിടെയാണ് ജോലി ചെയ്യുന്നത്.

വിസ പുതുക്കാന്‍ കഴിയാത്തതിനാല്‍ പവിത്രനെ നാട്ടിലേക്ക് തിരിച്ചയക്കാന്‍ കമ്പനി തീരുമാനിക്കുകയായിരുന്നു.

ഏപ്രില്‍ രണ്ട് ബുധനാഴ്ച രാത്രി ജോലിക്കെത്താഞ്ഞ പവിത്രന്റെ കിടപ്പുമുറിയുടെ വാതിലില്‍ സഹപ്രവര്‍ത്തകര്‍ മുട്ടിവിളിച്ചപ്പോള്‍ യാതൊരു പ്രതികരണവുമുണ്ടായില്ല. തുടര്‍ന്ന പൊലീസെത്തി വാതില്‍ പൊളിച്ച് അകത്തുകടന്നപ്പോഴാണ് പവിത്രനെ തൂങ്ങിമരിച്ച നിലയില്‍ കണ്ടത്.

അവിവാഹിതനായ പവിത്രന് പ്രായം ചെന്ന മാതാപിതാക്കളും ഒരു സഹോദരിയും ഒരു സഹോദരനുമുണ്ട്. കഴിഞ്ഞ അഞ്ച് വര്‍ഷമായി പവിത്രന്‍ നാട്ടില്‍ ചെന്നിരുന്നില്ല.

സല്‍മാനിയ മെഡിക്കല്‍ കോംപ്ലക്സ് മോര്‍ച്ചറിയിലാണ് മൃതദേഹം സൂക്ഷിച്ചിരിക്കുന്നത്.